Cyhoeddi enillwyr prif wobrau'r dysgwyr yn Eisteddfod yr Urdd

Lloyd Wolfe o Gaerdydd ydy enillydd Medal y Dysgwyr

Lloyd Wolfe o Gaerdydd sydd wedi ennill Medal y Dysgwyr yn Eisteddfod yr Urdd Dur a Môr.

Yn yr un seremoni, cyhoeddwyd mai Joe Morgan, hefyd o'r brifddinas, sydd wedi cipio Medal Bobi Jones - y brif wobr arall i ddysgwyr.

Nod y ddwy gystadleuaeth ydy gwobrwyo unigolion sydd wedi ymrwymo i ddysgu Cymraeg ac yn ymfalchïo yn eu Cymreictod.

Roedd y rownd derfynol, yn llawn tasgau amrywiol, yn cael ei chynnal ar y maes ddydd Mercher.

Y beirniad ar gyfer y ddwy wobr eleni oedd Miriam Elin Jones ac Elin Meek.

Joe Morgan o Gaerdydd sydd wedi ennill Medal Bobi Jones eleni

Mae Medal y Dysgwyr yn cael ei rhoi i berson ifanc rhwng Blwyddyn 10 a dan 19 oed, sy'n gallu dangos sut maen nhw'n defnyddio'r iaith o ddydd i ddydd yn yr ysgol, coleg, neu'r gwaith ac yn gymdeithasol.

O naw ymgeisydd, Lloyd Wolfe ddaeth i'r brig.

Mae'n astudio Lefel A mewn Cerddoriaeth, llenyddiaeth Saesneg, Drama a Chymraeg Ail Iaith yn Ysgol Uwchradd Gymunedol Gorllewin Caerdydd.

"Yn fy amser hamdden dwi'n mwynhau cyfansoddi cerddoriaeth a mynychu gigs Cymraeg fel Tafwyl a Maes B," meddai.

"Dwi'n teimlo bod yr iaith Gymraeg wedi cael effaith mor enfawr ar fy mywyd i gan fy mod i'n ei defnyddio hi mewn bob agwedd o fywyd.

"Dwi'n defnyddio Cymraeg hefo fy ffrindiau ar draws Cymru ac yn enwedig hefo fy ngwaith fel llysgennad dros y Coleg Cymraeg eleni - mae'n gyfle mawr gallu gweithio trwy gyfrwng y Gymraeg."

Alex McLean oedd yn ail, a Georgia Jones yn drydydd - y ddau o Sir y Fflint.

Mae Medal Bobi Jones yn cael ei rhoi i unigolyn 19-25 oed, sy'n dangos sut maen nhw'n defnyddio'r iaith o ddydd i ddydd drwy ateb cwestiynau am eu rhesymau dros ddysgu'r iaith, yr effaith mae dysgu'r Gymraeg wedi cael ar eu bywyd, a'u gobeithion ar gyfer y dyfodol.

Daw'r enillydd Joe Morgan o Gaerdydd, ac mae yn ei flwyddyn gyntaf ym Mhrifysgol Abertawe yn astudio newyddiaduriaeth gyda chyfryngau a chyfathrebu.

Dywedodd: "Yn ystod fy amser yn y brifysgol, dwi wedi ymuno â'r Gymdeithas Gymraeg i gael ymarfer mewn lle cymdeithasol a phrofi mwy o'r diwylliant.

"Dwi'n caru gwneud fideos ar-lein trwy gyfrwng y Gymraeg.

"Yn gyffredinol, mae fy nhaith i astudio'r iaith wedi fy ngalluogi i werthfawrogi ac i garu'r iaith a'i diwylliant, a dwi mor ddiolchgar am bob drws mae'r iaith wedi ei agor i fi."

Brawd Joe, Gwilym Morgan, oedd enillydd Medal y Dysgwyr yn Eisteddfod yr Urdd Sir Gaerfyrddin yn 2023.

Susanna Power o Gaerdydd oedd yn ail yn y gystadleuaeth, a Deryn-Bach Allen-Dyer o Fro Morgannwg yn drydydd.