Wrecsam v Caerdydd ac Abertawe v Man City yng Nghwpan yr EFL

Dyw Wrecsam a Chaerdydd ddim wedi chwarae ei gilydd ers i Wrecsam ennill drwy giciau o'r smotyn yn rownd gynderfynol FAW Premier Cup yn 2004

Mi fydd dau dîm o Gymru'n wynebu ei gilydd ym mhedwaredd rownd Cwpan y Gynghrair wrth i Wrecsam groesawu Caerdydd i'r Stok Cae Ras.

Mae Abertawe hefyd wedi llwyddo sicrhau gêm gartref ond yn erbyn un o gewri'r Uwch Gynghrair, Manchester City.

Mi fydd y gemau'n cael eu cynnal yn ystod yr wythnos sy'n dechrau ar 27 Hydref.

Dyma'r tro cyntaf yn hanes y gystadleuaeth i dri chlwb o Gymru gyrraedd y bedwaredd rownd, a'r tro cyntaf ers dros 20 mlynedd i Wrecsam chwarae Caerdydd.

O leiaf un tîm o Gymru yn y rownd nesaf

Abertawe oedd y tîm cyntaf o Gymru i gyrraedd y bedwaredd rownd ar ôl i dîm Alan Sheehan frwydro'n ôl i guro tîm arall o'r Uwch Gynghrair, Nottingham Forest.

Hyd yma mae'r Elyrch hefyd wedi curo Crawley Town a Plymouth Argyle yn y gystadleuaeth.

Fe gurodd Caerdydd, sydd bellach yn Adran Un, dîm o'r Uwch Gynghrair hefyd gyda Joel Colwill a Callum Robinson yn sgorio yn erbyn Burnley i'w curo 2-1.

Dim ond un gêm y mae'r Adar Gleision wedi'i cholli y tymor hwn, ac yng ngweddill y gystadleuaeth eleni mae nhw wedi curo Swindon Town a Cheltenham Town.

Mae Wrecsam wedi cyrraedd y bedwaredd rownd am y tro cyntaf ers 1977-78 ar ôl curo Reading 2-0 nos Fawrth, gyda'r Cymro Nathan Broadhead yn sgorio'r ddwy gôl yn y Stok Cae Ras.

Mae tîm Phil Parkinson hefyd wedi curo dau dîm o'r Bencampwriaeth i gyrraedd y man yma, sef Hull City a Preston North End.

Mae o leiaf un tîm o Gymru am gyrraedd y rownd nesaf ac yna dim ond dwy gêm fydd cyn cyrraedd Wembley.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.