'Fydd cleifion Betsi ddim yn disgwyl mwy na dwy flynedd am driniaeth'

Mae Dyfed Edwards yn dweud ei fod yn "eithaf ffyddiog" na fydd unrhyw un ar y rhestr aros hirdymor erbyn diwedd 2025

Mae bwrdd iechyd mwyaf Cymru yn dweud na fydd unrhyw gleifion yn aros am fwy na dwy flynedd am driniaeth y GIG erbyn diwedd y flwyddyn.

Dywedodd Dyfed Edwards, Cadeirydd Bwrdd Iechyd Betsi Cadwaladr, ei fod yn "eithaf ffyddiog" na fydd unrhyw un ar y rhestr aros hirdymor erbyn diwedd 2025.

Mae'r bwrdd iechyd wedi bod o dan y lefel uchaf o arolygiaeth gan y llywodraeth ers Chwefror 2023.

Cafodd ei roi mewn mesurau arbennig gyntaf ym mis Mehefin 2015, ac mae'r Ceidwadwyr Cymreig wedi galw eto am ymchwiliad cyhoeddus i'r bwrdd iechyd.

Mae'r ffigyrau diweddaraf yn dangos fod amseroedd aros o fwy na dwy flynedd wedi gostwng i ychydig o dan 8,400 erbyn diwedd mis Mawrth 2025 – y lefel isaf ers mis Ebrill 2021.

Ond fe fethon nhw â chyrraedd y nod o 8,000 ac maen nhw'n uwch na rhai GIG Lloegr.

Roedd y mwyafrif o'r rhai a oedd yn aros am driniaeth ym Mwrdd Iechyd Betsi Cadwaladr.

Dywedodd Dyfed Edwards wrth Newyddion S4C: "'Dan ni'n wynebu sefyllfa capasiti - dyna be' 'di'r cwestiwn canolog.

"Erbyn diwedd y flwyddyn calendr yma dwi'n eithaf ffyddiog na fydd neb yn aros bellach na dwy flynedd am driniaeth yn y bwrdd iechyd yma."

Fis Rhagfyr diwethaf, addawodd y Prif Weinidog Eluned Morgan dorri'r niferoedd sy'n aros dwy flynedd neu fwy am driniaethau wedi'u cynllunio o 24,000 i "tua 8,000" erbyn gwanwyn eleni.

Yr union nifer oedd 8,389 ac o ganlyniad mae'r gwrthbleidiau yn mynnu bod y targed wedi ei fethu.

Mae Betsi Cadwaladr yn un o ddau fwrdd iechyd sydd wedi methu cyrraedd eu targed

Wrth siarad yn y Senedd yn gynharach yr wythnos hon, cadarnhaodd yr Ysgrifennydd Iechyd, Jeremy Miles nad oedd gan fyrddau iechyd Bae Abertawe, Hywel Dda, a Phowys unrhyw gleifion yn aros mwy na dwy flynedd am driniaeth.

Ond dywedodd fod dau fwrdd iechyd sef Caerdydd a'r Fro a Betsi Cadwaladr, wedi methu cwrdd â'u targedau.

Dywedodd Mr Miles wrth Aelodau o'r Senedd: "Mae'r broblem fwyaf difrifol yng ngogledd Cymru, lle o'r wythnos hon ymlaen, bydd swyddogion Llywodraeth Cymru yn gweithio gyda staff y bwrdd iechyd er mwyn gwella sefyllfa triniaethau sydd wedi'u cynllunio."

Ychwanegodd: "Rwy'n disgwyl i'r bwrdd iechyd i leihau arosiadau hir yn sylweddol erbyn diwedd chwarter cyntaf y flwyddyn [ariannol] hon."

'Ar y trywydd iawn'

Gofynnodd Newyddion S4C i Dyfed Edwards, Cadeirydd Betsi Cadwaladr, pryd yr oedd yn disgwyl i hynny gael ei ostwng: "Mae'n ffocws ni ar wella'r bwrdd iechyd ei hun, a'r darpariaeth iechyd sy' 'na ar gyfer gogledd Cymru.

"Mae o wedi gwella, a 'dan ni ar y siwrne yna. Rhyw is-gynnyrch o lwyddiant y bwrdd iechyd fydd dod allan o fesurau arbennig - y ffordd yna dwi'n meddwl mae'r ceffyl a'r drol yn gweithio."

Wrth gyfeirio at sylwadau Mr Miles am gydweithio gyda'r llywodraeth dywedodd y cadeirydd: "Mae swyddogion yna wedi dod mewn yr wythnos diwethaf i edrych ar pa gamau 'dan ni'n cymeryd - ac i ddeall rhai o'r anawsterau 'dan ni'n wynebu a weithiau dal ein llaw ni wrth i ni wneud y gwaith.

"Dwi'n meddwl bo' ni wedi dangos i swyddogion y llywodraeth ein bod ni ar y trywydd iawn ac weithiau mae'r llywodraeth angen y sicrwydd yna a does dim byd gwell na dod mewn a gweld drosoch chi'ch hunain i gael y dystiolaeth yna a dyna maen nhw wedi'i wneud yr wythnos diwethaf 'ma."