Un person wedi marw ac un arall yn yr ysbyty ar ôl gwrthdrawiad
Bu'r ffordd ar gau am tua 10 awr ar ôl y digwyddiad nos Fercher
- Cyhoeddwyd
Mae Heddlu Dyfed-Powys yn apelio am wybodaeth wedi gwrthdrawiad angheuol yn Sir Gâr nos Fercher.
Fe ddigwyddodd y gwrthdrawiad ar yr A4138 rhwng cylchfan Llangennech a chylchfan ger yr amlosgfa am oddeutu 22:50.
Roedd dau gar yn rhan o'r gwrthdrawiad sef BMW arian a Peugeot du 208 a bu farw gyrrwr y BMW o'i anafiadau.
Mae gyrrwr y Peugeot yn parhau i fod mewn cyflwr difrifol yn yr ysbyty.
Bu'r ffordd ar gau tan 08:45 fore Iau.
Mae plismyn yn apelio ar unrhyw un a oedd yn teithio ar ffordd yr A4138 ar y pryd neu sydd ag unrhyw luniau dash cam i gysylltu â nhw.