'Neuadd fwyd y Sioe yn help i ddenu busnes o dramor'

Mae posib gwneud cysylltiadau gwerthfawr o gael presenoldeb yn y Sioe Fawr, medd Kirstie Jones o Hufenfa De Arfon

Mae'r Sioe Frenhinol wedi cael ei ddisgrifio gan fusnesau bwyd a diod Cymru fel "ffenest siop" ar gyfer denu prynwyr masnachol byd-eang.

Yn ôl rhai ar y 70 stondin yn Neuadd Fwyd y sioe, mae'r ardal yn pontio'r bwlch rhwng y cynhyrchwyr â'r marchnadoedd amrywiol, ac yn gyfle i greu cysylltiadau.

Daw hyn wedi i'r sector sicrhau trosiant o £9.3bn yn 2023.

"Yn y ddwy flwyddyn ddiwetha', 'dan ni wedi allforio i America," meddai Kirstie Jones, rheolwr marchnata Hufenfa De Arfon.

Ychwanegodd eu bod yn "'neud cysylltiadau reit dda yn y sioe" a bod Llywodraeth Cymru yn "dod â phobl rownd, rhai pobl o dramor yn dod yma" sy'n prynu nwyddau ar ran gwledydd eraill.

Dywed Max Evans bod cwmni Crwst yn gwerthu nwyddau i gwmnïau amlwg fel Harrods a Selfridges

Wedi cychwyn drwy bobi bara o'u cartref yn 2016, mae gan gwmni Crwst ddau gaffi bellach, a nifer o wobrau i'w henw.

Mae eu cynnyrch nawr ar gael mewn siopau byd-enwog.

"Ar y funud ma' caramel range ni i gyd yn cael eu gwerthu yn Harrods, ma' hwnna'n big name drop i ni," meddai Max Evans, rheolwr gweithrediadau Crwst.

"Hefyd, mae granola ni fan hyn yn cael ei werthu yn Selfridges - two big names fan 'na…

"Ni'n cwrdd â phobl sy'n prynu stwff ni o fan 'ny a helpu i bridgeo y gap 'na.

"Bydden ni ddim yn cwrdd â nhw 'se nhw ddim yn dod i'r sioe. Mae'n helpu ni lot."

Prysurdeb ardal Neuadd Fwyd y Sioe Frenhinol

Uwch y neuadd fwyd ar faes y sioe mae lolfa fusnes, lle mae 300 o gynhyrchwyr yn arddangos eu bwyd a diod.

Mae 360 o brynwyr yn ymweld â'r ystafell yn ystod wythnos y sioe.

Gobaith Llywodraeth Cymru oedd cynyddu gwerth y sector 'sylfaen bwyd' i o leiaf £8.5 biliwn erbyn 2025.

Llynedd, serch hynny, roedd gan y sector - sef busnesau sy'n cynhyrchu, prosesu a chyfanwerthu nwyddau bwyd a diod - drosiant o £9.3 biliwn, gyda'r targed yn cael ei gyrraedd dwy flynedd yn gynnar.

Dywed Ieuan Edwards bod ei gwmni, Edwards of Conwy, wedi dechrau gwerthu bwydydd i'r Dwyrain Canol

Wrth ddisgrifio cyflwr y sector bwyd a diod yng Nghymru, dywedodd Ieuan Edwards, cyfarwyddwr cwmni Edwards of Conwy: "Mae hwn yn ffenest siop nid yn unig i Gymru, ond i Brydain ac Ewrop hefyd.

"'Dan ni, er enghraifft, wedi dechrau gwerthu yn y Middle East.

"Ma' hynny'n dod yn aml iawn oherwydd y gwelwch chi brynwr yn dod i'r sioe 'ma, achos mae o'n un o'r sioeau mwya' blaenllaw yn Ewrop bellach, a mae hyn yn rywbeth fedrwn ni gyd fod â hyder ynddo fo, a balchder hefyd."