Carcharu dyn 'peryglus ofnadwy' am ymosod ar ddynes yn ei chartref

Mae dyn "peryglus ofnadwy" wedi cael ei garcharu am dros naw mlynedd am ymosod yn rhywiol ar ddynes yn ei chartref yng Nghaerdydd.

Fe aeth Thamer Alrabie, 36 oed o ardal Lecwydd, mewn i gartref dynes nad oedd yn ei hadnabod yn hwyr ar nos Sul, 12 Ionawr eleni cyn ymosod yn rhywiol arni a'i bygwth gyda chyllell.

Cafodd tad y ddynes ei ddeffro gan y sŵn ac fe lwyddodd i'w hel allan o'r tŷ.

Fe gafodd Alrabie ei arestio o fewn 24 awr o'r digwyddiad ac yna plediodd yn euog i dresmasu er mwyn cyflawni trosedd o natur rywiol, ymosod yn rhywiol, ymosod drwy guro a bygwth person gyda chyllell.

Mewn gwrandawiad yn Llys y Goron Caerdydd ar 21 Tachwedd, fe gafodd ei ddedfrydu i naw mlynedd a dau fis dan glo.

'Hawl gan bawb i deimlo'n ddiogel yn eu cartref'

Wedi'r dedfrydu dywedodd y ddynes: "Dydw i ddim am adael i ddigwyddiadau'r noson honno fy niffinio i fel 'dioddefwr'.

"Rydw i'n oroeswr, ac fe wnaf ailadeiladu fy llwybr i."

Dywedodd y ditectif gwnstabl Luke Rimes o Heddlu'r De fod ymosodiadau gan ddieithriaid fel hyn yn "anarferol iawn yn ne Cymru" ond bod Alrabie yn amlwg yn "unigolyn peryglus ofnadwy".

"Mae gan bawb yr hawl i deimlo'n ddiogel yn eu cartref eu hunain, ac mae'r fath yma o ddigwyddiad yn hunllef i bob menyw.

"Byddai'r noson yma wedi gallu bod mor wahanol heb ymyrraeth ddewr gan y tad.

"Mae'r dioddefwr wedi dangos gymaint o ddewrder a chryfder drwy'r broses, ac ry'n ni'n gobeithio y bydd canlyniad yr achos llys yn cynnig rhywfaint o gysur ac yn ei galluogi i ddechrau teimlo'n ddiogel unwaith eto."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.