Pennaeth newydd GIG Cymru yn 'poeni' am restrau aros

Cafodd Jacqueline Totterdell ei phenodi yn bennaeth newydd GIG Cymru ym mis Gorffennaf eleni

Ni fydd pob bwrdd iechyd yng Nghymru yn cyrraedd targed Llywodraeth Cymru i ddileu'r rhestrau aros hiraf erbyn y gwanwyn, yn ôl prif weithredwr newydd GIG Cymru, Jacqueline Totterdell.

Roedd y Gweinidog Iechyd, Jeremy Miles, wedi addo na fyddai neb yn aros dros ddwy flynedd am driniaeth erbyn diwedd mis Mawrth 2026 ac roedd yn "hyderus" y byddai modd cyrraedd y targed.

Mae'r ffigyrau diweddaraf yn dangos bod mwy na 8,700 o gleifion yng Nghymru wedi bod yn aros dwy flynedd neu fwy, o'i gymharu â 168 yn Lloegr.

Yn ei chyfweliad cyntaf ers ei phenodi dywedodd Ms Totterdell fod y targed bron â chael ei gyrraedd yn y rhan fwyaf o ardaloedd ond bod bwrdd iechyd Betsi Cadwaladr yn y gogledd yn achos pryder.

Cafodd Bwrdd Iechyd Betsi Cadwaladr ei roi dan fesurau arbennig am yr eildro ym mis Chwefror 2023

Yn ôl y prif weithredwr newydd, mae "modd trwsio" problemau Bwrdd Iechyd Betsi Cadwaladr ond ychwanegodd bod angen mwy o gymorth ar y bwrdd i'w datrys.

Mae 63% o'r cleifion sy'n aros dwy flynedd neu fwy yng Nghymru yn byw yn ardal Betsi Cadwaladr - bwrdd a gafodd ei roi o dan fesurau arbennig am yr eildro yn 2023.

Mae rhai'n dadlau bod y bwrdd yn rhy fawr ac yn galw am ei rannu, ond dywedodd Ms Totterdell nad yw hi wedi dod i benderfyniad eto.

Ychwanegodd nad taflu'r cyfan i'r awyr yw'r ateb cywir gan y byddai hynny'n "tynnu sylw" oddi ar wella gwasanaethau.

Dywedodd ei bod yn canolbwyntio hefyd ar baratoi'r GIG ar gyfer etholiad nesaf y Senedd, a chydweithio â'r llywodraeth nesaf i wneud penderfyniadau er lles pobl Cymru.