Diswyddo plismon Dyfed-Powys dros negeseuon hiliol a sarhaus

Roedd y Cwnstabl Gareth Horton wedi rhannu negeseuon WhatsApp sarhaus a hiliol gyda heddwas arall

Mae plismon gyda Heddlu Dyfed-Powys wedi cael ei ddiswyddo am rannu negeseuon sarhaus a hiliol gyda heddwas arall.

Clywodd gwrandawiad disgyblu bod y Cwnstabl Gareth Horton wedi rhannu negeseuon gyda phlismon o Heddlu Glannau Mersi oedd yn bychanu menywod, pobl trawsryweddol, pobl hoyw a phobl du, pan oedd yn gweithio i'r un llu.

Yn ôl cadeirydd y gwrandawiad yng Nghaerfyrddin, Ian Arundale, roedd cynnwys y negeseuon ar "ran uchaf y raddfa o ran difrifoldeb".

Ychwanegodd fod patrwm o ymddygiad dros gyfnod o amser yn erbyn grwpiau oedd wedi eu hamddiffyn o dan ddeddfwriaeth cydraddoldeb.

Yn ôl Mr Arundale, roedd y negeseuon yn rhai oedd yn gwahaniaethu ac mi fyddai'r cyhoedd yn arswydo o weld y cynnwys.

Dywedodd Mr Arundale mai diswyddo'r Cwnstabl Horton "oedd yr unig gosb addas".

Ceisio 'ffitio mewn'

Roedd y Cwnstabl Gareth Horton o Bowys, sy'n dad i ddau o blant, wedi bod yn cyfnewid negeseuon WhatsApp gyda chwnstabl arall o Heddlu Glannau Mersi rhwng mis Mawrth a Gorffennaf 2023, pan oedd yn gweithio i'r llu.

Fe symudodd i weithio gyda Heddlu Dyfed-Powys ym mis Hydref 2023, ac fe ddaeth y negeseuon i'r fei yn dilyn ymchwiliad i swyddog arall, pan feddiannwyd ei ffôn.

Yn ystod y gwrandawiad, fe dderbyniodd y Cwnstabl Horton, sy'n gyn-filwr, bod y negeseuon wedi torri safonau proffesiynol yr heddlu ac yn gyfysytyr â chamymddwyn difrifol.

Roedd wedi ymateb i rai negeseuon amhriodol gan y swyddog o Heddlu Glannau Mersi gydag emojis "crio chwerthin".

Dywedodd y Cwnstabl Horton wrth y gwrandawiad ei fod wedi anfon y negeseuon er mwyn ceisio "ffitio mewn" gyda chydweithwyr yn Heddlu Glannau Mersi, ac nad oedd y negeseuon yn "adlewyrchu ei wir gymeriad".

Wrth amlinellu'r achos yn ei erbyn, dywedodd Katherine Hampshire, bargyfreithiwr ar ran Heddlu Dyfed-Powys, bod y neges gyntaf a anfonwyd gan y cwnstabl o Heddlu Glannau Mersi at y Cwnstabl Horton ar 26 Mawrth, yn cynnwys sylwadau oedd yn gwneud hwyl am bobl trawsryweddol.

Bu'r ddau yn cyfnewid o leiaf wyth o negeseuon tan Gorffennaf 2023.

Roedd un neges anfonwyd ar 31 Mai 2023 gan y Cwnstabl Horton yn bychanu rhywioldeb y cyflwynydd teledu Phillip Schofield.

Roedd neges arall a rannwyd yn dangos lluniau o gerrig gyda'r neges bod hi'n fis Pride yn y dwyrain canol.

Fe anfonwyd neges hiliol am George Floyd - dyn du a lofruddiwyd gan heddwas yn yr Unol Daleithiau - ar 27 Mehefin.

Yn ôl Ms Hampshire roedd y negeseuon yn hiliol, yn gwahaniaethu yn erbyn menywod, yn sarhaus i bobl drawsryweddol a phobl hoyw, a doedd y Cwnstabl Horton ddim wedi hysbysu unrhyw un ar ôl derbyn y negeseuon na'u herio.

Dywedodd Ms Hampshire y "byddai ei ymddygiad yn tanseilio gwasanaeth yr heddlu a hyder y cyhoedd yn y gwasanaeth".

'Difeddwl ac anghyfrifol'

Yn ôl bargyfreithiwr y Cwnstabl Horton, Susan Ferrier, roedd ei chleient yn derbyn ei fod wedi torri safonau proffesiynol oedd gyfystyr â chamymddwyn difrifol.

Er hynny, roedd hi'n feirniadol fod y broses disgyblu wedi ei chyflymu mewn ffordd oedd yn "anghyson", yn ei barn hi.

Dywedodd Ms Ferrier fod y Cwnstabl Horton yn derbyn iddo ymddwyn mewn ffordd "difeddwl ac anghyfrifol" ac y dylai fod wedi herio'r negeseuon.

Ond mynnodd nad oedd y negeseuon yn "adlewyrchu ei wir gymeriad" a'i fod wedi gwneud "popeth dan ei reolaeth" i wneud yn iawn am ei ymddygiad.

Roedd Ms Ferrier wedi awgrymu y byddai diswyddo'r Cwnstabl Horton yn anghymesur.

Fe gerddodd y Cwnstabl Horton allan o'r gwrandawiad gyda'i wraig ar ôl i'r cadeirydd gyhoeddi y byddai'n cael ei ddiswyddo.

Bydd ei enw yn cael ei ychwanegu at y rhestr o unigolion sydd wedi'u gwahardd rhag bod yn yr heddlu.