Staff elusen Gymreig 'wedi'u bygwth' ar ôl i Musk rannu fideo ar-lein

Elon Musk sydd berchen ar blatfform X, Twitter gynt, erbyn hyn

Mae staff elusen ffoaduriaid wedi dioddef "bygythiadau i'w bywydau" ar ôl i'r biliwnydd, Elon Musk, rannu neges ar-lein yn awgrymu eu bod yn defnyddio fideos o ferched ifanc i "ddenu" ymfudwyr i'r DU.

Dywedodd Cyngor Ffoaduriaid Cymru (WRC) fod staff a gwirfoddolwyr wedi wynebu aflonyddu ar-lein ar ôl i hen fideo ymddangos eto ar X, Twitter gynt.

Mae'r fideo, a gafodd ei greu yn 2023 fel rhan o brosiect ysgol, yn dangos grŵp o ferched ifanc yn egluro sut mae Cymru yn wlad groesawgar i ffoaduriaid.

Dywedodd WRC eu bod yn cymryd "datganiadau ffug a difenwol o ddifrif".

Disgrifiodd Llywodraeth Cymru'r honiadau fel rhai "hollol anghyfrifol".

'Propaganda'

Yn y neges, sydd wedi'i rannu gan Mr Musk, mae'r elusen yn cael eu cyhuddo o "ddefnyddio merched 12 oed... i ddenu dynion ymfudol i ddod i Gymru".

Mae'r neges wedi cael ei gweld dros 5.5 miliwn o weithiau.

Wrth bostio ar X, cyhuddodd cyn-arweinydd Ceidwadwyr Cymru yn y Senedd, Andrew RT Davies, weinidogion Llywodraeth Lafur Cymru o ddefnyddio plant ysgol fel "propaganda" i hyrwyddo "prosiect ideolegol".

Dywedodd Mr Davies hefyd ei fod yn "hollol amhriodol i sefydliad gwleidyddol fynd i ysgolion a defnyddio plant mewn propaganda fel hyn".

Dywedodd WRC eu bod yn y broses o gyfeirio sylwadau Mr Davies at Gomisiynydd Safonau'r Senedd.

Mae Andrew RT Davies wedi cyfeirio at y fideo fel "propaganda"

Mewn ymateb, dywedodd Andrea Cleaver, Prif Swyddog Gweithredol WRC, fod y fideo "fyth wedi'i fwriadu fel hysbyseb i annog ymfudiad ond wedi'i rannu i ddangos positifrwydd disgyblion".

Dywedodd yr elusen fod y fideo wedi'i dynnu'n ôl yn fuan ar ôl ei gyhoeddi oherwydd "adwaith gelyniaethus" a'i fod wedi'i ddefnyddio "y tu allan i'r cyd-destun cywir".

Mae un aelod staff yn yr elusen, nad oedd eisiau cael ei enwi, wedi datgan bod y gamdriniaeth mae eu cydweithwyr wedi'i derbyn dros y dyddiau diwethaf wedi gwneud iddyn nhw'n deimlo'n "sâl".

"Mae posibilrwydd cryf y bydd yn effeithio'n uniongyrchol ar fywydau'r babanod, y plant, a'r menywod bregus rwy'n gweithio gyda nhw, rhai ohonynt sydd eisoes wedi bod yn ddioddefwyr troseddau casineb yn y DU," meddai.

"Mae'n gwneud i mi deimlo'n gorfforol sâl clywed bod fy nghydweithwyr wedi cael eu cam-drin ar-lein ac wedi wynebu bygythiadau i'w bywydau oherwydd y gweithredoedd hyn."

'Ton o sylwadau hiliol'

Dywedodd cydweithiwr arall eu bod yn teimlo'n "ddigalon" o ganlyniad i rai o'r negeseuon a gafodd eu derbyn.

"Mae'n tanseilio'r gwaith caled rydyn ni'n ei wneud i helpu eraill i ddechrau bywydau newydd a theimlo'n ddiogel yng Nghymru," meddai.

"Roeddwn i'n arbennig o siomedig gyda'r don o sylwadau hiliol a oedd yn targedu staff.

"Mae Cymru wedi'n croesawu ni gyda breichiau agored, gan roi'r diogelwch roeddem yn chwilio amdano."

Andrea Cleaver: 'Dylai pawb geisio'r ffeithiau cyn rhannu neu gefnogi cynnwys anghywir'

Cafodd Cyngor Ffoaduriaid Cymru eu sefydlu dros 30 mlynedd yn ôl ac maen nhw'n darparu cyngor a chefnogaeth i ffoaduriaid sy'n dod i Gymru.

Mewn datganiad, dywedodd Ms Cleaver y byddai'r elusen yn "annog pawb i geisio'r ffeithiau cyn rhannu neu gefnogi cynnwys anghywir".

"Byddai Cyngor Ffoaduriaid Cymru yn hoffi egluro nad ni a greodd nac a gomisiynodd y fideo sy'n cylchredeg ar hyn o bryd," meddai.

"Er nad oeddem yn rhan o'i gynhyrchiad, fe wnaethom ailgyhoeddi'r post fel enghraifft gadarnhaol o bobl ifanc yn hyrwyddo negeseuon o dosturi a chynhwysiant.

"Rydym yn cymryd unrhyw ddatganiadau ffug neu ddifenwol o ddifrif ac yn gweithio'n agos gyda'r heddlu a'r awdurdodau perthnasol i fynd i'r afael â'r mater hwn.

"Mae Cyngor Ffoaduriaid Cymru yn parhau'n ddiysgog yn ein cenhadaeth i gefnogi ceiswyr noddfa a ffoaduriaid, gan feithrin dealltwriaeth a hyrwyddo cynhwysiant."

'Honiadau ffug'

Dywedodd llefarydd ar ran Llywodraeth Cymru: "Mae'r honiadau yn ymwneud â'r fideo hwn yn anghywir ac yn gwbl anghyfrifol.

"Cynhyrchwyd y fideo dan sylw gan grŵp o blant ifanc i ddangos eu hysgol fel lle croesawgar.

"Cafodd y fideo ei dynnu'n ôl yn 2023 wedi i'r ysgol dderbyn cam-drin helaeth ar-lein.

"Ni ddylai unrhyw un sy'n poeni am ddiogelwch ein pobl ifanc fod yn rhannu honiadau ffug amdanynt."