Dau yn eu hugeiniau wedi marw mewn gwrthdrawiad yn Sir Gâr

Fe ddigwyddodd y gwrthdrawiad ar yr A477 rhwng Llanddowror a Ros-goch

Mae dau berson yn eu hugeiniau wedi marw yn dilyn gwrthdrawiad rhwng dau gar yn Sir Gâr.

Cafodd yr heddlu eu galw i'r gwrthdrawiad ar yr A477 rhwng Llanddowror a Ros-goch tua 16:00 ddydd Iau.

Dywedodd Heddlu Dyfed-Powys mai Jaguar du a Ford Fiesta du oedd yn rhan o'r digwyddiad.

Cadarnhaodd y llu fod dau o bobl - dyn 27 oed a menyw 25 oed, oedd yn teithio yn yr un car - wedi marw yn y digwyddiad.

Mae dau berson arall - 27 a 33 oed - yn parhau yn yr ysbyty wedi'r digwyddiad, ond y gred yw nad yw eu hanafiadau yn peryglu eu bywydau.

Mae'r heddlu'n apelio ar unrhyw un sydd â gwybodaeth am y digwyddiad i gysylltu â nhw.