Gweithiwr iechyd yn gwadu cynllwynio i lofruddio plentyn
Mae Tracy Turner yn gweithio fel cynorthwyydd theatr yn Ysbyty Athrofaol Cymru
- Cyhoeddwyd
Mae gweithiwr iechyd o Gaerdydd wedi cael ei chyhuddo o gynllwynio i lofruddio, herwgipio a threisio plentyn.
Mae Tracy Turner, 51 oed o ardal y Rhath, wedi pledio'n ddieuog i wyth cyhuddiad.
Mae'r rheiny'n cynnwys cynllwynio i dreisio a cham-drin merch dan 13 oed, ei herwgipio a'i llofruddio, yn ogystal â chyhuddiadau'n ymwneud â lluniau anweddus o blant.
Mae Ms Turner wedi'i chyhuddo ar y cyd â Stuart Compton, 45 o ardal Cathays, sydd hefyd yn gwadu'r cyhuddiadau o gynllwynio i lofruddio, herwgipio a threisio plentyn
Fe wnaeth y ddau ymddangos yn Llys y Goron Caerdydd yn gynharach fis Ionawr, ac mae disgwyl i'r achos yn eu herbyn ddechrau fis Mai.
Mae Ms Turner yn gweithio fel cynorthwyydd theatr yn Ysbyty Athrofaol Cymru yn y brifddinas.
Dywedodd llefarydd ar ran Bwrdd Iechyd Caerdydd a'r Fro bod Ms Turner wedi cael ei gwahardd a'u bod yn cydweithio â'r heddlu.