Aberfan: Dyn yn y llys ar gyhuddiad o geisio llofruddio menyw feichiog
Mae Daniel Popescu wedi ei gyhuddo o drywanu menyw yn Aberfan ar 5 Rhagfyr
- Cyhoeddwyd
Mae dyn wedi ymddangos yn y llys ar gyhuddiad o geisio llofruddio menyw feichiog a gafodd ei thrywanu yn Aberfan.
Fe ymddangosodd Daniel Mihail Popescu o flaen Llys y Goron Caerdydd fore Iau.
Mae'r dyn 29 oed o Ferthyr Tudful hefyd wedi ei gyhuddo o stelcio a bygwth tystion.
Fe gafodd Andrea Pintili, 29, ei thrywanu ger ei chartref ar Stryd Moy yn Aberfan ar 5 Rhagfyr.
Fe siaradodd Daniel Popescu drwy gyfieithydd mewn Romaneg i gadarnhau ei enw a'i ddyddiad geni.
Ni chafodd y diffynnydd ei gyhuddo'n ffurfiol gan fod disgwyl i adroddiadau seiciatryddol gael eu cwblhau.
Cafodd dyddiad ar gyfer achos llawn ei bennu i ddechrau yn Llys y Goron Merthyr Tudful ar 3 Mehefin.
Cafodd y diffynnydd ei gadw yn y ddalfa.