Rhybudd timau achub wedi galwadau i fynyddoedd Eryri mewn storm

Aelodau Tîm Achub Mynydd Llanberis yn ymateb i ddigwyddiad ar fynydd Tryfan yn ystod Storm Amy

Mae timau achub mynydd yn y gogledd wedi cyhoeddi datganiad ar y cyd yn galw ar bobl i ystyried yn ofalus cyn mentro allan i'r mynyddoedd mewn tywydd garw.

Cafodd timau achub Llanberis, Dyffryn Ogwen ac Aberglaslyn eu galw i ddau ddigwyddiad yn ystod gwyntoedd cryfion Storm Amy - un ar fynydd Tryfan a'r llall yn ymwneud â dau berson oedd yn ceisio dringo Crib Goch.

Yn ôl y timau, mae'n rhaid ystyried diogelwch y gwirfoddolwyr hefyd wrth ymateb i alwadau mewn amodau peryglus.

Er yn cydnabod mai penderfyniad personol ydi mynd i fynydda mewn tywydd garw, mae'r timau yn erfyn ar bobl i sicrhau bod ganddyn nhw'r sgiliau, y profiad a'r cyfarpar cywir i allu gwneud hynny yn ddiogel.

Ar raglen Dros Frecwast fore Mercher, dywedodd Elfyn Jones - sy'n aelod o dîm achub Llanberis - nad ydyn nhw am rwystro pobl rhag mynd i fwynhau'r mynyddoedd ond bod angen i bobl ystyried y perygl iddyn nhw ac i eraill.

"Mi oedd yna ragweld y storm ers dipyn o ddyddiau ynghynt ond dydi pobl ddim yn paratoi yn ddigonol a ddim yn edrych ar y rhagolygon cyn mynd allan i'r mynyddoedd, ac felly yn mynd i drybini ar y mynydd," meddai.

Mae 'na ofyn ar bobl i ystyried diogelwch aelodau'r timau achub cyn mentro allan i fynyddoedd fel Tryfan

Ychwanegodd Mr Jones ei bod hi'n hanfodol fod y rhai sydd yn mynd allan i gerdded ar y mynyddoedd yn paratoi o flaen llaw.

"'Dan ni ddim yn erbyn pobl yn mynd allan mewn tywydd gwael ond be sydd angen ydi i bobl baratoi ac i feddwl be ydi effaith y gwynt, glaw a thywydd gwael arnyn nhw," esboniodd.

"Os ydyn nhw eisiau mynd i gerdded i Gwm Idwal neu fyny i Lyn Llydaw, mae hynny'n grêt, ond mae mynd i fyny Crib Goch neu grib ogleddol Tryfan mewn gwyntoedd cryfion tua 70-80mya yn mynd â nhw i fyd perygl iawn."

"Mae'n rhoi'r achubwyr mewn perygl, pobl gyffredin ydan ni hefyd."

Tîm Achub Mynydd Llanberis wrth eu gwaith ar Grib Goch

Wrth drafod yr achos penodol ar Grib Goch y penwythnos diwethaf, dywedodd Mr Jones iddyn nhw gael yr alwad am tua 07:00 ond eu bod wedi penderfynu peidio ymateb yn syth oherwydd y gwyntoedd cryfion.

"Doedd y ddau ddim wedi eu hanafu ac felly i fod yn ddiogel i bawb, wnaethon ni aros rhyw ddwy awr cyn anfon achubwyr allan, ar ôl iddi oleuo a'r gwynt ostegu," meddai.

"Mae'n ymddangos, yn eithaf sicr, bod y rhain wedi gweld Crib Goch ar TikTok a gyrru o dde Lloegr am antur a sialens, heb erioed fod fyny mynydd o'r blaen.

"Heb bwyntio gormod o fai.... mae'n amlwg fod angen mwy o baratoi na gwylio fideo ar y cyfryngau cymdeithasol.

"Meddyliwch o ddifrif - a ydi'r gallu a sgiliau a'r offer iawn gennych chi, ac wrth gwrs, mae modd troi nôl bob tro.

"'Dan ni o hyd yn dweud bod y mynydd yn mynd i fod yno fory, wythnos nesaf neu fis nesaf."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.