Gohirio cwest Cymro fu farw yn Prague ar ôl cael ei daro gyda photel

Bu farw David 'Dai' Richards - sydd i'w weld yma gyda'i bartner - mewn ysbyty yn ninas Prague ar 21 Medi

Bu farw dyn o Rondda Cynon Taf ar ôl cael ei daro gyda photel tra ar benwythnos stag yn y Weriniaeth Tsiec, mae cwest wedi clywed.

Fe glywodd y gwrandawiad ym Mhontypridd fod David 'Dai' Richards, 31, a oedd yn byw yn Aberpennar gyda'i bartner a'i blant, wedi teithio i Prague ar 19 Medi.

Clywodd y crwner fod yr amgylchiadau llawn yn dal yn "aneglur", ond fod 'na "ddigwyddiad ar y strydoedd lle cafodd ei daro ar ei ben gyda photel" nes ymlaen yr un noson.

Cafodd ei gludo i'r ysbyty a bu farw ar 21 Medi.

Cafodd ymchwiliad post-mortem ei gynnal yn Ysbyty'r Brifysgol yn Prague.

Daeth hwnnw i'r casgliad fod Mr Richards wedi marw o ganlyniad i niwed i'r ymennydd.

Dywedodd y Crwner, Patrica Morgan, fod ganddi "reswm i gredu fod y farwolaeth yn un dreisgar neu annaturiol".

Fe agorodd y cwest cyn ei ohirio, gan ddweud bod angen rhagor o ymholiadau a thystiolaeth cyn dod i gasgliad.