Caernarfon: Carcharu dyn wedi ymosodiad hiliol 'ffiaidd'

Roedd ymddygiad Jones yn "ofnadwy ac yn annerbyniol" yn ôl Heddlu'r Gogledd

Mae dyn 24 oed wedi cael ei garcharu am ymosod yn hiliol ar weithiwr siop yng Nghaernarfon.

Cafodd Mark Anthony Jones, o ardal Maesincla, Caernarfon, ei gyhuddo o ymosod yn hiliol ac o grogi yn fwriadol wedi'r digwyddiad ym mis Awst y llynedd.

Fe wnaeth Jones weiddi sylwadau hiliol a bygythiol at weithiwr siop cyn ymosod arno yn gorfforol.

Cafodd ei garcharu am ddwy flynedd a phedwar mis mewn gwrandawiad yn Llys y Goron Caernarfon ddydd Mawrth.

Ymddygiad 'gwarthus a ffiaidd'

Clywodd y llys fod Jones wedi mynd i siop ar stryd Y Bont Bridd yng Nghaernarfon ar 2 Awst, 2024.

Dechreuodd weiddi ar un o weithwyr y siop gan ddweud y dylai "fynd yn ôl i dy wlad dy hun" a "fe wna'i dy ladd di".

Fe aeth Jones ymlaen i ymosod yn gorfforol ar y gweithiwr ar ôl iddo gael cais i adael. Gafaelodd yn y gweithiwr a'i dagu cyn i aelod o'r cyhoedd ddod i'w gwahanu.

Fe wnaeth Jones geisio rhedeg i ffwrdd cyn i'r heddlu gyrraedd, ond cafodd ei ddal yn fuan wedi hynny.

Dywedodd yr Arolygydd Rhanbarth dros-dro, Andy Davies: "Roedd ymddygiad Jones tuag at weithiwr oedd ond yn ceisio gwneud ei waith, yn ofnadwy ac yn annerbyniol.

"Roedd y digwyddiad yn ddychrynllyd i'r dioddefwr ac mae'n beth da fod pobl eraill o gwmpas i'w helpu.

"Fe fyddwn yn ymateb yn gadarn i achosion o droseddau casineb, ac rydw i wir yn gobeithio y bydd Jones yn meddwl yn galed am ei ymddygiad ffiaidd."

Mae Jones hefyd wedi cael gorchymyn atal fydd mewn grym am 10 mlynedd er mwyn amddiffyn y dioddefwr.