Cyhoeddi rhestr fer albwm Cymraeg y Flwyddyn 2025

Cowbois Rhos Botwnnog oedd yr enillwyr y llynedd am eu halbwm Mynd â'r tŷ am dro

Mae'r Eisteddfod Genedlaethol wedi cyhoeddi'r 10 albwm sydd wedi cyrraedd rhestr fer Albwm Cymraeg y Flwyddyn eleni.

Bydd yr enillydd yn cael ei gyhoeddi ar ddydd Mercher y Brifwyl yn Wrecsam ddechrau fis nesaf.

Bwriad y wobr, sy'n cael ei threfnu ar y cyd gyda BBC Radio Cymru, yw dathlu pob math o gerddoriaeth Gymraeg sy'n cael ei rhyddhau.

Mae'r wobr bellach wedi bod yn rhedeg ers 2014, a Cowbois Rhos Botwnnog oedd yr enillwyr y llynedd am eu halbwm Mynd â'r tŷ am dro.

Y beirniaid eleni yw Martha Owen, Nico Dafydd, Elain Roberts, Gruffydd Davies, Branwen Williams a Heulyn Rees.

Yr albymau sydd wedi cyrraedd y rhestr fer eleni:

• Adwaith - Solas

• Bwncath - Bwncath III

• Don Leisure - Tyrchu Sain

• Elfed Saunders Jones - Cofiwch Roswell

• Gwenno Morgan - Gwyw

• Gwilym Bowen Rhys - Aden

• Pys Melyn - Fel Efeilliaid

• Sywel Nyw - Hapusrwydd yw Bywyd

• Tai Haf Heb Drigolyn - Ein Albwm Cyntaf Ni

• Ynys - Dosbarth Nos