Ydy Gabriel Batistuta yn siarad Cymraeg?

Cynrychiolodd Gabriel Batistuta ei wlad - Yr Ariannin - 78 o weithiau rhwng 1991 a 2002

Mae si ar led wedi bod am flynyddoedd fod un o chwaraewyr mwyaf tîm pêl-droed Yr Ariannin, Gabriel Batistuta, yn siarad Cymraeg, ac mae'r gohebydd chwaraeon, Gareth Rhys Owen yma i ddistewi'r celwydd yma unwaith ac am byth!

“Pwy oedd y siaradwr Cymraeg diwethaf i sgorio gôl yn Wembley?”

Roedd ein tîm cwis ni yn gwybod yr ateb, sef Iwan Roberts, a dyna a gyflwynwyd i’r tîm ar y bwrdd drws nesaf i’w farcio.

Munudau yn ddiweddarach roedd cwis blynyddol Clwb Rygbi Cydweli wedi troi’n ffradach llwyr wedi i’r cwisfeistr ddarllen yr atebion

“...a’r ateb i gwestiwn 8: Graham Gooch. Iawn, cwestiwn 9 - Pwy oedd y siaradwr Cymraeg diwethaf i sgorio gôl yn Wembley? Na 'Quiz Teamer Aguilera', nid John Hartson, anghywir 'University Challenged', dim Iwan Roberts… Yr ateb yw:

"...Gabriel Batistuta!”

Cafodd protestiadau ein tîm ni eu gwrthod a chafon ni’n gwahardd o Gwis Mawr y Flwyddyn 2005 am wrthod derbyn bod Gabriel Batistuta yn siarad Cymraeg.

Gabriel Batistuta yn dathlu ar ôl sgorio gôl dyngedfennol i Fiorentina yn erbyn Arsenal yn Nghynghrair y Pencampwyr UEFA yn Wembley nôl yn Hydref 1999

'Angel Gabriel' yn siarad iaith y nefoedd?

I ddileu unrhyw ansicrwydd, dyw cyn-ymsodwr yr Ariannin, Gabriel Batistuta, ddim yn siarad Cymraeg. Does ganddo fe ddim cysylltiadau Cymreig o gwbl.

Gwglwch Batistuta Welsh Speaker ac mae yna ddigonedd o ffynonellau yn awgrymu ei fod e’n medru iaith y nefoedd, ond fe alla’i gadarnhau gant y cant nad yw’n gallu.

Y gwirionedd oedd bod stori wrach o’r fath yn medru bodoli yn y dyddiau cyn bod y we yn rhoi atebion cadarnhaol naill ffordd neu’r llall.

Pam felly bod y mytholeg yma yn bodoli? Yr ateb amlwg yw cysylltiadau Cymru â’r Ariannin drwy’r Wladfa.

Yr eironi mwyaf yw i Batistuta gael ei fagu yn nhalaith Santa Fe sydd ben arall y wlad i Batagonia.

"Chwarddodd e yn fy wyneb"

Gabriel Heinze yn chwarae in Manchester United yn 2005 - Archentwr arall sydd â dim gwaed Cymreig, er mawr siom i newyddiadurwyr

Nid Batistuta oedd yr unig Archentwr i ddenu'n sylw ni yng Nghymru. Tua’r un cyfnod â’r cwis yng Nghydweli fe anfonodd gohebydd o adran Chwaraeon BBC Cymru e-bost i glwb Manchester United i ofyn i’r amddiffynnwr Gabriel Heinze a oedd e’n medru siarad Cymraeg.

Cafodd Heinze ei fagu yn nhalaith Entre Rios sy' ychydig yn agosach i’r Wladfa na Santa Fe, ond nid llawer agosach. O fewn diwrnod fe ddaeth ateb gan y clwb:

“Fe es i’r holl ffordd i’r sesiwn ymarfer i ofyn i Gabriel fy hun a fe chwarddodd e yn fy wyneb.”

Dyna gau pen y mwdwl ar honno hefyd.

Chwilota am ryw gysylltiad Cymreig...

Yr Archentwr, Eduardo Sepulveda yn reidio yn y Tour de France. Tybed a sylwodd ar y ddraig goch yn cyhwfan gerllaw?

Mae yna ambell i helfa i’r Wladfa wedi bod ychydig yn fwy llewyrchus. Cafodd y beiciwr Eduardo Sepulveda ei eni a’i fagu yn Rawson ar gyrion Trelew. Fe gysylltais gyda fe yn gweddïo am ragor o waed Cymreig i'w ddilyn yn y Tour a’r Giro d'Italia:

“Er nad oes gen i deulu Cymreig a dwi ddim yn siarad Cymraeg dwi’n ymwybodol o’r diwylliant ac yn teimlo hunaniaeth gyda’r bobl. Er mai Archentwr ydw i, mae’r cysylltiadau gyda Chymru yn gryf yma.”

Mae’r ateb o’r fath yn codi calon ac yn cadarnhau bod hi wastad yn werth holi.

Ac os ga’i gynnig un darn o gyngor i chi: Peidiwch â gwastraffu’ch amser yn anfon e-byst i glybiau pêl-droed yn India yn holi os oes gan Alwyn George gysylltiadau â Chymru. Mae e mor Gymreig â Gabriel Heinze...