Saib dros dro i waith ar lein ar gyfer gig Taylor Swift

Mae Taylor Swift yn perfformio yn Stadiwm Principality, Caerdydd nos Fawrth 18 Mehefin

Mae Network Rail yn atal gwaith peirianyddol ar lein Bro Morgannwg am ddiwrnod i osgoi trafferthion i bobl sy'n defnyddio'r trên i fynd i gyngerdd Taylor Swift yng Nghaerdydd.

Bydd yr holl leiniau rhwng Maes Awyr Rhyngwladol Caerdydd yn Y Rhws a Phen-y-bont ar Ogwr ar gau am 10 diwrnod rhwng dydd Sadwrn 8 Mehefin a dydd Llun 17 Mehefin.

Ond fe fydd y lein yn ailagor ddydd Mawrth 18 Mehefin ar gyfer y cyngerdd ei hun, sy'n rhan o daith fyd-eanf Eras y gantores.

Dywed Network Rail y bydd yna fysiau i gludo teithwyr yn lle trenau tra bo'r gwaith cynnal a chadw "hanfodol" yn cael ei gynnal.

Mae'r gwaith yn cynnwys adnewyddu dros 130 metr o drac ger Pen-y-bont ar Ogwr.

Fe werthodd y tocynnau ar gyfer y cyngerdd yn Stadiwm Principality o fewn munudau.

Gymaint yw'r galw am docynnau nes bod rhai cael eu gwerthu ymlaen am brisiau sylweddol uwch na'r pris gwreiddiol.

Mae yna rybuddion wedi bod i bobl osgoi gael eu twyllo wrth geisio gael tocyn.