'Dwi wrth fy modd' dod â gwobr yn ôl i Gymru - Ynyr Roberts

Mae'r cerddor Ynyr Roberts, aelod o'r grŵp Brigyn, wedi ennill gwobr am gerddoriaeth annibynnol.

Daeth y Cymro'n fuddugol yng Ngwobrau AIM yn Llundain nos Fawrth, yr "alternative Brit awards, mewn ffordd", meddai.

Enillodd wobr yng nghategori'r artist annibynnol newydd sydd wedi cael ei chwarae fwyaf ar radio a theledu, a hynny am ei brosiect 'Popeth'.

Cafodd y noson wobrwyo ei chynnal yn y Roundhouse, Llundain, a dywedodd ar Dros Frecwast fod "cael y sylw mewn digwyddiad fel hyn - just 'di bod yn wych".

Dywedodd Ynyr fod y gwobrau'n dathlu artistiaid sy'n rhyddhau cerddoriaeth yn annibynnol

"Dwi tu allan i'r Roundhouse bore 'ma a braf 'di cael dathlu a bod yn rhan o ddigwyddiad mor fawreddog," meddai Ynyr.

"Dwi wrth fy modd cael dod â'r wobr yn ôl i Gymru. Oedd 'na enwa' mawr yn y sîn gerddoriaeth ymysg y rhai oedd wedi'u henwebu neithiwr."

Esboniodd fod y wobr yn dathlu artistiaid sy'n rhyddhau cerddoriaeth yn annibynnol.

"Gwobrau ydyn nhw sy'n rhoi sylw i artistiaid sydd ddim ar labeli mawr.

"Dyna be' 'da ni'n neud rhan fwya'r amsar yng Nghymru. Ma' bob label sydd hefo artist sy'n canu drwy'r iaith Gymraeg - yn label annibynnol," meddai.

'Cefnogaeth yn wych'

Ychwanegodd Ynyr, sydd o Lanrug yn wreiddiol ond bellach yn byw yng Nghaerdydd, mai'r "gefnogaeth dwi 'di cael - dyna beth sy'n meddwl gymaint i fi".

"Ma'r gefnogaeth dwi 'di ei gael gan Radio Cymru, gan ffrindiau, teulu a Chymru gyfan ar gyfer y gerddoriaeth wedi bod yn wych ers i fi ddechrau prosiect Popeth."

Ychwanegodd fod dros 20 mlynedd bellach wedi pasio ers i fand Brigyn ddechrau a'u bod yn dal wrthi'n perfformio.

"Ma' 2025 'di bod yn flwyddyn go arbennig i ni yn dathlu," meddai.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.