Wynne Evans yn gadael taith Strictly wedi sylw 'amhriodol'

Mae Wynne Evans wedi ymddiheuro am wneud sylw "amhriodol ac annerbyniol"

Mae Wynne Evans yn dweud ei fod wedi cytuno gyda'r BBC i gamu 'nôl o'i raglen ar Radio Wales ac o weddill taith fyw Strictly Come Dancing, er mwyn rhoi blaenoriaeth i'w les.

Ddydd Sul fe ymddiheurodd y darlledwr a'r canwr am sylw "amhriodol ac annerbyniol" yn ystod lansiad taith fyw Strictly Come Dancing yn gynharach fis yma.

Roedd Wynne Evans eisoes wedi dweud y byddai'n "cymryd seibiant" o gyflwyno ei raglen foreol ar BBC Radio Wales, ond mewn datganiad ar y cyfryngau cymdeithasol brynhawn Mawrth, dywedodd ei fod yn bwriadu "defnyddio'r amser i hunan fyfyrio".

Doedd y BBC na BBC Cymru am wneud sylw pellach ar y mater.

Daeth ymddiheuriad Mr Evans, 52, ar ôl i ohebydd o'r Mail on Sunday ei recordio yn gwneud sylw yn ystod sioe taith Strictly yn y Birmingham Arena.

Roedd y cyflwynydd ac eraill yn paratoi ar gyfer llun ar y llwyfan ar y pryd.

Dywedodd Mr Evans mewn datganiad fod ei "iaith yn amhriodol ac yn annerbyniol, ac rwy'n ymddiheuro'n ddiffuant am hynny".

Yn ôl llefarydd ar ran Strictly Live Tour a BBC Studios, maen nhw "wedi ei gwneud yn glir iawn i Wynne nad ydym yn goddef ymddygiad o'r fath ar y daith".

'Ymddiheuro o waelod calon'

"Rydw i wedi cytuno ar y cyd gyda'r BBC i gymryd seibiant o gyflwyno fy rhaglen radio, i gamu'n ôl o daith fyw Strictly ac o ddigwyddiadau cyhoeddus eraill er mwyn blaenoriaethu fy lles," meddai Wynne Evans mewn datganiad.

"Rydw i'n ymddiheuro o waelod calon am unrhyw boen mae fy ngweithredoedd amhriodol i wedi ei achosi, ac rydw i'n bwriadu defnyddio'r amser yma i hunan fyfyrio.

"Ymddiheuriadau i'r rhai na fyddaf i'n gallu eu gwylio yn y perfformiadau olaf, ac rwy'n ddiolchgar iawn i'r gefnogaeth anhygoel yr wyf wedi ei dderbyn gan griw y daith."

Roedd Wynne Evans yn un o'r sêr oedd yn cystadlu yn y gyfres ddiweddaraf o Strictly Come Dancing

Roedd Wynne Evans yn un o'r sêr oedd yn cystadlu yn y gyfres ddiweddaraf o Strictly Come Dancing - a hynny gyda'i bartner dawnsio Katya Jones.

Mae wedi bod yn rhan o daith fyw y gyfres ledled y DU, gyda'r olaf o'r 30 perfformiad wedi'i drefnu ar gyfer 9 Chwefror.

Ni wnaeth Mr Evans ddawnsio yn ystod y sioe ddydd Sadwrn yn Glasgow oherwydd anaf i'w bigwrn ond fe wnaeth o ganu.

Dywedodd mewn fideo ar ei gyfrif Instagram nos Sul ei fod yn gobeithio dychwelyd i ddawnsio.