Cyflwyno Parth Atal Ffliw Adar ar gyfer Cymru gyfan

DofednodGetty Images

Mae'r mesurau yn golygu bod rheolau llymach ar gyfer unrhyw un sy'n cadw adar caeth

Mae Llywodraeth Cymru wedi cyflwyno Parth Atal Ffliw Adar ar gyfer y wlad gyfan, fydd yn dod i rym ddydd Iau.

Mae'r mesurau yn golygu bod rheolau llymach ar gyfer unrhyw un sy'n cadw adar caeth.

Dywed y llywodraeth y bydd y mesurau mewn grym "nes bod gostyngiad mewn lefelau risg yn nodi nad oes ei angen mwyach".

Daw wedi i Loegr a'r Alban gyflwyno cyfyngiadau tebyg dros y penwythnos.

'Mesur rhagofalus'

Dywedodd Huw Irranca-Davies, y Dirprwy Brif Weinidog ac Ysgrifennydd Materion Gwledig, nad oes unrhyw achos o ffliw adar difrifol wedi'i gofnodi yng Nghymru hyd yma y tymor hwn, ond bod y newidiadau'n cael eu cyflwyno fel "mesur rhagofalus".

"Ni chadarnhawyd unrhyw achosion o ffliw adar pathogenig iawn (HPAI) mewn dofednod neu adar eraill a gedwir yng Nghymru hyd yn hyn y tymor hwn," meddai.

"Fodd bynnag, mae nifer yr achosion mewn heidiau dofednod yn parhau i gynyddu ledled Prydain Fawr ac mae risg uwch o drosglwyddo o adar gwyllt i adar a gedwir.

"Ar sail cyngor gan Brif Swyddog Milfeddygol Cymru, rwyf wedi penderfynu cyflwyno Parth Atal Ffliw Adar Cymru gyfan (AIPZ)."

Huw Irranca-Davies

Dywedodd Huw Irranca-Davies ei fod yn gwithredu "ar sail cyngor gan Brif Swyddog Milfeddygol Cymru"

Mae cyflwyno'r parth yn golygu y bydd gofyn i bawb sy'n cadw dofednod ac adar caeth eraill "gymryd camau priodol ac ymarferol", gan gynnwys:

  • Sicrhau nad yw'r ardaloedd lle mae'r adar yn cael eu cadw yn ddeniadol i adar gwyllt;

  • Bwydo a dyfrio'ch heidiau mewn ardaloedd caeedig rhag denu adar gwyllt;

  • Sicrhau bod cyn lleied o fynd a dod â phosibl o fannau caeedig lle cedwir adar;

  • Glanhau a diheintio esgidiau, defnyddio dipiau traed cyn mynd i mewn i ardaloedd caeedig dofednod, a chadw ardaloedd lle mae adar yn byw yn lân ac yn daclus;

  • Sicrhau bod cofnodion yn cael eu cadw a bod rhestr wirio hunanasesu bioddiogelwch gorfodol yn cael ei gwblhau o fewn saith diwrnod.

Os yw pobl yn cadw mwy na 500 o adar, bydd gofyn iddyn nhw gymryd camau bioddiogelwch ychwanegol hefyd, gan gynnwys cyfyngu ar fynediad i bobl nad yw'n hanfodol eu bod yn dod i gysylltiad â'r adar, newid dillad neu esgidiau cyn mynd i fannau caeedig lle cedwir adar, a glanhau a diheintio cerbydau.

Pynciau cysylltiedig