Ateb y Galw: Alis Glyn

Alis Glyn

Y cerddor Alis Glyn o Gaernarfon wnaeth ennill Tlws Sbardun yn Eisteddfod Genedlaethol Wrecsam 2025 am gyfansoddi ei chân Lleuad Llinyn Arian.

Sefydlwyd Tlws Sbardun yn 2016 er mwyn cydnabod cyfraniad y cerddor a'r cyfansoddwr Alun Sbardun Huws, a chaiff ei gwobrwyo'n flynyddol er mwyn annog cyfansoddwyr y dyfodol.

Alis yw'r ferch gyntaf i ennill Tlws Sbardun a hefyd yr enillydd ieuengaf, a hi sy'n Ateb y Galw yr wythnos yma.

Beth yw eich atgof cyntaf?

Dwi'n cofio bod ar wylia' yn Nice yn Ne Ffrainc pan o'n i tua tair oed. Mewn siop deganau nes i afael yng nghoes dyn gan feddwl mai coes Dad oedd hi a 'nath y dyn ddychryn.

Gwenno Huws, gweddw y diweddar Alun 'Sbardun' Huws yn cyflwyno Tlws Sbardun i Alis ar faes Eisteddfod Genedlaethol Wrecsam 2025

Beth yw eich hoff le yng Nghymru a pham?

Gwersyll y Vanner yn Llanelltyd, ger Dolgellau oherwydd bod hi'n ddistaw wrth olion yr abaty.

Beth yw'r noson orau i chi ei chael erioed?

Aros ar fy nhraed tan bump o'r gloch y bore efo fy ffrindiau ysgol yn Albufeira ar ôl gorffen Lefel A.

Disgrifiwch eich hun mewn tri gair.

Penderfynol, brwdfrydig a chreadigol.

Seremoni Tlws Sbardun yn y Tŷ Gwerin

Pa ddigwyddiad yn eich bywyd sydd o hyd yn gwneud i chi wenu neu chwerthin wrth feddwl 'nôl?

Pan oeddwn tua tair oed roeddwn yn mynnu mynd i bob sioe Cyw yn ystod wythnos y Steddfod gan dynnu aelod gwahanol o'r teulu efo fi. Roeddwn i'n gwbod pob un cân a'r sgript erbyn diwedd yr wythnos, a'r uchafbwynt oedd cael mynd ar y llwyfan a chael 'slepjan'.

Beth oedd y digwyddiad a gododd y mwyaf o gywilydd arnoch chi erioed?

Yn y Steddfod sir pan o'n i tua naw oed nes i anghofio 'ngeiriau'n llwyr yn y gystadleuaeth gerdd dant ac ail ganu pennill yn gyfan gwbl.

Pryd oedd y tro diwethaf i chi grio?

Wrth wylio ffilm Barbie.

Chwarae yn Tafwyl yn y Tafiliwn efo'r band

Oes gennych chi unrhyw arferion drwg?

Colli clust-dlysau.

Beth yw eich hoff lyfr, ffilm, albwm neu bodlediad a pham?

Albwm y band Ynys, Dosbarth Nos.

Byw neu farw, gyda phwy fyddech chi’n cael diod a pham?

Joni Mitchell, oherwydd 'mod i wrth fy modd efo steil ei chaneuon hi a'i gallu hi i chwarae'r gitâr.

Alis a'i band yn chwarae yng Nghaffi Maes B yn Eisteddfod Genedlaethol Wrecsam 2025

Dywedwch rywbeth amdanoch chi eich hun nad oes yna lawer o bobl yn ei wybod.

Dwi'n cael fy mhen-blwydd 'run diwrnod â Meic Stevens.

Ar eich diwrnod olaf ar y blaned, beth fyddech chi’n ei wneud?

Chwarae piano a chyfansoddi cân.

Pa lun sy’n bwysig i chi a pham?

Pob Nadolig mae Anna a Gwil drws nesa' a Steff a Dei dros ffordd a fi yn cael tynnu llun pile up ar y soffa. Dyma oedd yr un cynta' ac mae pob llun ers hynny'n gwneud i mi wenu.

Petasech chi’n gallu bod yn rhywun arall am ddiwrnod, pwy fyddai ef/hi?

Fi yn saith oed yn cael allweddella' fel anrheg gan Siôn Corn; roeddwn wedi gwirioni yn lân.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [e-mail], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.