Ysgolion ar gau wedi rhybudd am rew i'r gogledd

Yr olygfa yn Llanbister ym Mhowys fore Mercher

Mae ysgolion ar gau a chyngor i bobl gymryd pwyll wedi i rybudd am rew fod mewn grym ar draws y gogledd ddydd Mercher.

Mae naw o ysgolion yn Sir y Fflint ar gau oherwydd yr amodau rhewllyd.

Roedd rhybudd rhew mewn grym yn siroedd Gwynedd, Conwy, Dinbych, Y Fflint a Wrecsam rhwng 17:00 ddydd Mawrth ac 12:00 ddydd Mercher.

Mae'r Swyddfa Dywydd yn rhybuddio y gallai pobl gael eu hanafu wrth lithro ar rew, ac mae 'na gyngor i gymryd gofal ar ffyrdd, palmentydd a llwybrau seiclo.

Maen nhw'n annog pobl i gadw golwg ar y rhagolygon ac i fod yn barod i newid cynlluniau teithio.

Mae rhybudd arall am eira a rhew mewn grym fore Iau

Mae rhybudd arall mewn grym fore Iau, a hynny am eira a rhew ar gyfer mwyafrif y wlad.

Mae'r rhybudd hwnnw yn weithredol rhwng 03:00 a 12:00 ar gyfer pobman oni bai am y de-ddwyrain.

Mae'r rhagolygon yn awgrymu mai nos Iau fydd y noson oeraf eto yn ystod y cyfnod yma o dywydd ansefydlog.