Dyn yn ddieuog ar ôl i ddau fabi gael eu canfod yn farw

Roedd Žilvinas Ledovskis (dde) wedi gwadu'r cyhuddiadau yn ei erbyn, tra bod Eglė Žilinskaitė wedi pledio'n euog i bedwar cyhuddiad

Mae dyn wedi ei gael yn ddieuog o gyhuddiadau yn ymwneud â marwolaethau dau fabi ym Mhen-y-bont ar Ogwr.

Cafodd yr heddlu eu galw i dŷ ar Heol Maes-y-felin ar stad Y Felin-wyllt yn y dref ym mis Tachwedd 2022 ble cafwyd hyd i gyrff y babanod.

Clywodd Llys y Goron Caerdydd fore Mawrth fod Gwasanaeth Erlyn y Goron (CPS) wedi penderfynu peidio cyflwyno tystiolaeth yn erbyn Žilvinas Ledovskis, 50, yn dilyn adolygiad o'r dystiolaeth.

Cafwyd Mr Ledovskis, o Abertawe, yn ddieuog gan y barnwr o ddau achos o gelu genedigaeth baban a dau gyhuddiad o atal claddedigaeth gyfreithiol a gweddus.

Mae Eglė Žilinskaitė, 31 oed o Gaerdydd, wedi pledio'n euog i ddau achos o gelu genedigaeth baban ac o ddau achos o atal claddedigaeth gyfreithiol a gweddus.

Bydd yn cael ei dedfrydu yn ddiweddarach.