Rownd a Rownd 'wedi buddsoddi £175m yn economi'r gogledd'

Mae'r gyfres yn cael ei ffilmio ym Mhorthaethwy a Llangefni ar Ynys Môn

Mae'r gyfres boblogaidd Rownd a Rownd wedi arwain at oddeutu "£175m yn cael ei fuddsoddi" gan S4C yn y gogledd-orllewin, yn ôl y cwmni sy'n creu'r rhaglen.

Wrth nodi 30 o flynyddoedd ers dechrau darlledu'r gyfres sydd wedi'i lleoli ar Ynys Môn, mae cwmni Rondo yn dweud bod y rhaglen yn cynnig cyfleoedd i sector greadigol gogledd Cymru yn ogystal â swyddi i'r gadwyn gyflenwi.

Yn ôl uwch-gynhyrchydd y rhaglen, Bedwyr Rees, mae llwyddiant y gyfres yn brawf bod lle i ehangu ar gynyrchiadau tebyg yng ngogledd Cymru er mwyn annog pobl i aros yn yr ardal.

Mae dros 100 o bobl bellach yn gweithio ar y gyfres - gan gynnwys actorion, ysgrifenwyr, cynhyrchwyr a chriwiau technegol.

Cafodd Rownd a Rownd ei darlledu yn gyntaf yn ôl ym mis Medi 1995 gyda'r rhan fwyaf o'r gwaith ffilmio yn digwydd yn nhref Porthaethwy, o dan y ffugenw Glanrafon.

Erbyn hyn, mae'r rhan fwyaf o'r gwaith ffilmio dan do neu ar setiau yn digwydd yn stiwdio Aria yn Llangefni, a chafodd ei hagor yn ystod cyfnod y pandemig.

Yn ôl y cwmni sy'n cynhyrchu'r gyfres, Rondo, mae'r garreg filltir yn brawf o ymrwymiad S4C i'r ardal.

Mae Bedwyr Rees yn dweud bod y gyfres yn "cyflogi nifer fawr o bobl"

"'Da ni'n amcangyfrif dros 30 mlynedd fod buddsoddiad S4C yn yr ardal yn dros £175m, ac mae'r rhan fwyaf o hynny yn gyflog," meddai Bedwyr Rees.

"Mae 97% o hwnna'n cael ei wario mewn dwy sir, Môn a Gwynedd - siroedd sydd ar sawl cyfri' yn ddifreintiedig, felly mae'n cyflogi nifer fawr o bobl."

Yn ôl Mr Rees, mae llwyddiant y gyfres dros y 30 o flynyddoedd yn brawf o bwysigrwydd y sector creadigol yng ngogledd Cymru.

"Mae'n fuddsoddiad real," ychwanegodd.

"Mae'n galluogi pobl i aros yn yr ardal yma, i fagu plant yn yr ardal yma yn y cadarnleoedd ac mae hynny'n rhywbeth o werth gwirioneddol.

"Be 'da ni angen ei wneud rŵan yn y gogledd ydi tyfu'r diwydiant yn ehangach fel bod mwy a mwy o bobl... nid yn unig hyfforddi pobl, ond eu cadw nhw yma."

Mae perchennog caffi a bwyty'r ardal, Jane Walsh, yn dweud bod y busnes yn gweld gwerth cael y cast a'r criw cynhyrchu yn yr ardal

Yn ogystal â chynnig swyddi i'r rheini sy'n gweithio'n uniongyrchol ar y gyfres, mae gwaith hefyd ar gael drwy'r gadwyn gyflenwi ac i fusnesau lleol.

Yn ôl Rondo, mae gwaith ymchwil gan gwmni Wavehill yn awgrymu bod bob "£1 o fuddsoddiad sy'n dod gan S4C gwerth £1.95 yn ehangach yn yr economi".

Gyda lot fawr o'r gwaith ffilmio yn digwydd yng nghanol tref Porthaethwy, mae Jane Walsh, sydd â chaffi a bwyty yn y dref, yn dweud bod y busnes yn gweld gwerth cael y cast a'r criw cynhyrchu yn yr ardal.

"Maen nhw'n dod i gael coffi efo ni, weithiau yn cael cinio ac weithiau yn aros efo ni i fyny'r grisiau.

"Maen nhw off am yr haf gyfan ond maen nhw'n dod yn ôl wedyn pan mae'r ysgolion yn dechrau'n ôl. Mae gennym ni bobl yn y gaeaf a'r haf, felly 'da ni'n reit hapus."

Mae Ioan Prys yn dweud bod yr actorion a'r gyfres yn "tynnu pobl i mewn i'r ardal"

Neges debyg sydd gan Ioan Prys sydd â siop gardiau a nwyddau Cymraeg ym Mhorthaethwy.

"Maen nhw'n wych, maen nhw 'di bod i mewn ac allan o'r siopau ers blynyddoedd," meddai.

"Nid dim ond yr actorion, mae pobl yn gweld yr actorion yn cerdded o gwmpas, ond mae gennych chi lot o staff sy'n gweithio yno sy'n beth grêt - swyddi da i bobl leol."

Yn ôl dirprwy arweinydd Cyngor Môn, mae lleoliad y gyfres yn cyfrannu'n fawr at yr economi leol ac i brysurdeb canol Porthaethwy.

"Does dim dwywaith amdani, â ni ar ochr stryd brysur fan yma ac mae'r lle ar agor i'r cyhoedd," meddai Robin Wyn Williams.

"Mae pobl yn dod yma i weld y set felly mae'n tynnu pobl i mewn i'r dref, sy'n fendigedig.

"Mae'r caffis, tai bwyta, a'r gwestai yn y dref, maen nhw gyd wedi cael gwerth economaidd allan o fodolaeth 'Rownd a Rownd' dros y blynyddoedd."

Wrth nodi'r garreg filltir, bydd cyngerdd yn cael ei chynnal yng nghanolfan Pontio nos Sadwrn.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.