Enwi dyn 22 oed fu farw yn dilyn digwyddiad ger Pontypridd

Mae'r dyn fu farw wedi ei enwi fel Liam Woolford, 22 oed o Borth, Rhondda Cynon Taf

Mae'r heddlu wedi enwi dyn 22 oed fu farw yn dilyn digwyddiad ar ystad yn Rhydyfelin, ger Pontypridd, ddydd Mawrth.

Cafodd yr heddlu eu galw toc cyn 00:40 fore Mawrth yn dilyn digwyddiad ar Poets Close, Rhydyfelin.

Bu farw Liam Woolford, o Borth yn Rhondda Cynon Taf, ar ôl cael ei anafu yn y digwyddiad.

Roedd yn un o dri o bobl yn eu hugeiniau a gafodd eu hanafu a'u trin yn yr ysbyty, ac mae'r ddau ddyn arall yn parhau i gael triniaeth.

Dywed teulu Liam: "Mae'r teulu yn meddwl am eu mab Liam yn ystod y cyfnod anodd hwn, ac yn gofyn am breifatrwydd."

Mae dyn 30 oed o Rydyfelin wedi ei arestio ar amheuaeth o lofruddiaeth ac o geisio llofruddio, dyn 22 oed o Don-teg wedi cael ei arestio ar amheuaeth o lofruddio, tra bod dynes 20 oed o Ben-y-graig wedi'i harestio ar amheuaeth o anafu'n fwriadol.

Mae'r tri yn parhau yn y ddalfa wrth i ymchwiliad yr heddlu barhau.