Darganfod dros 400 o blanhigion canabis ger gorsaf heddlu

Cafodd 435 o blanhigion canabis eu darganfod ychydig dros 80 llath o orsaf heddlu Castell Newydd Emlyn

Mae swm mawr o gyffuriau wedi'i ddarganfod mewn adeilad ger gorsaf heddlu yn Sir Gaerfyrddin.

Cafodd 435 o blanhigion canabis eu symud o hen siop Co-op yng Nghastell Newydd Emlyn, bedwar drws o'r orsaf heddlu.

Cafodd Heddlu Dyfed Powys warant i archwilio'r adeilad nos Fercher, 6 Tachwedd.

Dywedodd person sy'n gweithio yn y dref, sydd am aros yn ddi-enw, wrth BBC Cymru "nad yw'n synnu" bod cyffuriau wedi ei ddarganfod yno a bod "arogl wedi bod yno ers mis, o leiaf".

Mae swyddogion yn dweud na chafodd unrhyw un ei arestio a'u bod nhw'n dal i ymchwilio.

Dywedodd yr heddlu bydd swyddogion yn yr ardal tra bod yr ymchwiliad yn parhau.