Mam wnaeth ffoi o Wcráin wedi marw ar ôl cael ei tharo gan gar

Roedd Tetiana Martynova wedi bod yn byw yng Nghymru ers Gorffennaf 2022, wedi iddi ffoi gyda'i mab o Wcráin

Bu farw menyw 40 oed o Wcráin ar ôl cael ei tharo gan gar tra roedd hi'n cerdded adref o'i gwaith ac ar y ffôn gyda ffrind, mae cwest wedi clywed.

Symudodd Tetiana Martynova a'i mab i Abertawe ar ôl ffoi o Wcráin pan ymosododd Rwsia ar y wlad ym mis Chwefror 2022.

Clywodd cwest iddi gael ei tharo gan gar ar Ffordd Castell-nedd, ger Treforys, ar ôl gorffen gwaith ar 31 Ionawr 2024, a'i "thaflu'n bell" tuag at y ffordd gyferbyn.

Roedd ei ffrind yn tybio fod Ms Martynova wedi gollwng ei ffôn ar ôl clywed y gwrthdrawiad tra'r oedd hi ar yr alwad.

Clywodd y cwest yn Abertawe fod gyrrwr y cerbyd, Jamie Hitchings, gweithiwr dur Tata, ar ei ffordd adref ar ôl gweithio shifft o 06:00 i 18:00.

Dywedodd Mr Hitchings nad oedd wedi gweld Ms Martynova, a oedd wedi gwisgo mewn du ac yn croesi mewn "rhan anghyffredin o'r ffordd", tan yn union cyn y gwrthdrawiad.

Dywedodd iddo daro ei frêcs cyn dod allan o'r car i helpu Ms Martynova.

Yna fe rwystrodd Mr Hitchings y ffordd gyda chonau cyfagos wrth geisio cael ymateb gan Ms Martynova.

Cafodd Ms Martynova ei throsglwyddo i Ysbyty Prifysgol Cymru, Caerdydd, lle bu farw o anaf difrifol i'r ymennydd ar 1 Chwefror.

'Ergyd drom' teulu cyn-AS

Wrth roi tystiolaeth, dywedodd y Cwnstabl Karl Painter, ymchwilydd gwrthdrawiadau fforensig i Heddlu De Cymru, mai dim ond un golau stryd oedd wedi'i oleuo ar adeg y digwyddiad.

Dywedodd fod wyneb y ffordd 50mya yn wlyb gyda "gwelededd cyfyngedig" oherwydd faint o law oedd yn disgyn, tywyllwch y lleoliad, a thopograffeg y ffordd.

Cadarnhaodd Cyngor Abertawe i'r heddlu hefyd fod goleuadau stryd wedi'u diffodd ar y pryd, fel rhan o fesurau lleihau ynni cenedlaethol, a oedd yn cynnwys diffodd goleuadau ar ôl asesiad risg.

Fe wnaeth Heddlu De Cymru ymchwilio i'r amgylchiadau, gan benderfynu peidio â chymryd camau pellach.

Dywedodd Dr Dai Lloyd yn flaenorol fod ei marwolaeth yn "ergyd drom" iddo ef a'i wraig

Fe wnaeth Dr Dai Lloyd - cyn-aelod o'r Senedd dros Orllewin De Cymru - a'i wraig roi lloches i Tetiana a'i mab Iliah wedi iddyn nhw ffoi o'r rhyfel yn Wcráin.

Dywedodd Dr Lloyd yn flaenorol fod ei marwolaeth yn "ergyd drom" iddyn nhw.

Dywedodd y cwpl mewn datganiad ei bod hi'n "ymwybodol iawn o ddiogelwch ffyrdd ac yn gymwys wrth groesi ffyrdd, gan wybod i ba gyfeiriad i edrych, a bod ganddi olwg berffaith".

Fe wnaethon nhw weld hi am y tro olaf ar 27 Ionawr pan aeth hi â nhw allan am frecwast hwyr ar ôl cael ei siec gyflog gyntaf.

Nododd y crwner cynorthwyol Paul Bennett fod Ms Martynova wedi bod yn gwisgo dillad du mewn ardal groesi "anghyffredin" nad oedd wedi'i goleuo â goleuadau stryd.

Daeth i'r casgliad bod marwolaeth Ms Martynova wedi'i hachosi gan wrthdrawiad ffordd.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.