Dau wedi eu cyhuddo ar ôl canfod corff menyw oedd ar goll

Cafodd corff Ms Veisi ei chanfod mewn cyfeiriad ym Mhenylan, meddai'r heddlu

Mae ditectifs wedi darganfod corff menyw 37 oed oedd ar goll, ar ôl i ymchwiliad llofruddiaeth gael ei lansio.

Cafodd Paria Veisi, o ardal Waun Ddyfal y brifddinas, ei gweld ddiwethaf am 15:00 ddydd Sadwrn pan adawodd ei man gwaith yn ardal Treganna yn gyrru Mercedes GLC 200 du.

Mae dyn o Benylan, Caerdydd, a menyw o White City Estate, Llundain, wedi eu cyhuddo.

Mae'r ddau wedi ymddangos yn Llys Ynadon Caerdydd ddydd Sadwrn ac wedi eu cadw yn y ddalfa.

Cafodd corff Ms Veisi ei chanfod mewn cyfeiriad ym Mhenylan, meddai'r heddlu.

Mae'r dyn 41 oed o Benylan wedi ei gyhuddo o lofruddiaeth, o beidio claddu corff marw mewn modd cyfreithlon a gweddus, ac ymosod ar berson gan achosi niwed corfforol.

Mae'r fenyw 48 oed o Stryd Awstralia, White City Estate, Llundain, wedi ei chyhuddo o beidio claddu corff marw mewn modd cyfreithlon a gweddus ac o gynllwynio i wyrdroi cwrs cyfiawnder.

Dywedodd yr uwch swyddog ymchwilio, Matt Powell: "Mae hwn yn dod a'n chwilio i Paria i ddiweddglo trist a thrasig. Bydd teulu Paria, pawb oedd yn ei hadnabod, a'r bobl yn ei chymuned leol, yn drist ac wedi synnu o glywed y datblygiadau diweddaraf."

Ychwanegodd y bydd ditectifs ac ymchwilwyr lleoliadau trosedd ym Mhenylan dros yr wythnosau nesaf.

Mae disgwyl i'r rhai sydd wedi eu cyhuddo ymddangos yn Llys y Goron Caerdydd ar 22 Ebrill.