Un o gymeriadau mawr Pobol y Cwm yn ei ôl - 25 mlynedd ers ei angladd

Mae Dyff Jones wedi dychwelyd i Gwmderi bron i 25 mlynedd ers ei angladd

Mae un o gymeriadau mwyaf cofiadwy opera sebon Pobol y Cwm wedi dychwelyd i'r gyfres - chwarter canrif ers ei angladd.

Cafodd gwylwyr S4C gipolwg annisgwyl o Dyff Jones ar goridor ward ysbyty nos Fawrth.

Does neb wedi gweld Dyff - sy'n cael ei chwarae gan yr actor Dewi Rhys - ers i'w angladd gael ei gynnal 'nôl yn y flwyddyn 2000.

Yr unig beth ddywedodd Dyff wrth gymeriad Cassie cyn i'r bennod orffen oedd: "O'n i methu cadw draw, Cass."

Ddydd Mercher, mae'r opera sebon yn cyrraedd carreg filltir arbennig wrth ddathlu hanner can mlynedd o fod ar yr awyr.

Cafodd y dihiryn Frank Price ei garcharu am ymosod ac am 'ladd' Dyff 'nôl yn 2000

Mae Dyff Jones yn un o gymeriadau mwyaf eiconig y gyfres, yn gyn-ŵr i Kath Jones ac yn dad i Stacey a Mark.

'Nôl yn 2000 roedd pawb yn credu fod Dyff wedi marw ar ôl i'r dihiryn Frank Price ymosod arno.

Cafodd cymeriad Price ei arestio yn dilyn yr ymosodiad, ond bu farw Dyff o'i anafiadau bythefnos yn ddiweddarach.

Wrth siarad â Cymru Fyw cyn darlledu'r bennod nos Fawrth, dywedodd Dewi Rhys: "Ydi, mae Dyff yn ôl, ond ble mae o wedi bod ac am ba hyd fydd o yma? Fydd rhaid i chi barhau i wylio."

Pobol y Cwm - a gafodd ei darlledu gyntaf yn 1974 - yw'r opera sebon fwyaf hirhoedlog yn y Gymraeg.

• Bydd cyfweliad estynedig gyda'r actor Dewi Rhys ar BBC Cymru Fyw fore Iau