Nain a thaid yn gwadu llofruddio eu hŵyr 2 oed

Cafodd Ethan Ives Griffiths ei ddarganfod wedi ei anafu yng nghartref ei nain a'i daid ar Lannau Dyfrdwy yn 2021

Mae nain a thaid bachgen dwy oed o Sir y Fflint wedi gwadu ei lofruddio.

Fe ymddangosodd Kerry Ives, 45, a Michael Ives, 46, o flaen Llys y Goron Yr Wyddgrug drwy gyfrwng fideo o garchardai gwahanol, wedi eu cyhuddo o lofruddio Ethan Ives Griffiths ym mis Awst 2021.

Cadarnhaodd y ddau eu henwau a phledio'n ddieuog i lofruddiaeth, achosi neu ganiatáu marwolaeth plentyn, a chreulondeb at berson dan 16.

Fe ymddangosodd mam Ethan, Shannon Ives, 27, yn y llys hefyd a gwadu achosi neu ganiatáu marwolaeth plentyn, a chreulondeb at berson dan 16.

Cafodd y bachgen ei ddarganfod wedi ei anafu yng nghartref ei nain a'i daid yn Garden City, Glannau Dyfrdwy.

Fe gafodd ei gludo i Ysbyty Countess of Chester cyn iddo gael ei symud i Ysbyty Alder Hey yn Lerpwl lle bu farw o anaf i'r ymennydd.

Cadarnhaodd y barnwr Rhys Rowlands y bydd yr achos llys yn erbyn y tri yn dechrau ar 11 Tachwedd a bod disgwyl iddo bara rhwng pedair a phum wythnos.

Cafodd Kerry a Michael Ives eu cadw yn y ddalfa ac fe gafodd Shannon Ives ei rhyddhau ar fechnïaeth.