Anafiadau difrifol i ddwy ferch ar ôl gwrthdrawiad
Mae dau ddyn wedi eu harestio yn dilyn y gwrthdrawiad yn ardal Mayhill
- Cyhoeddwyd
Mae dwy ferch 11 oed wedi eu hanafu'n ddifrifol yn dilyn gwrthdrawiad yn Abertawe.
Fe gafodd yr heddlu eu galw i ardal Mayhill y ddinas tua 15:50 brynhawn Gwener.
Roedd adroddiadau am wrthdrawiad rhwng beic modur a sgwter trydan ar y gyffordd rhwng Heol Waun Wen a Heol Tegid.
Mae dau ddyn, 18 a 24, wedi eu harestio ar amheuaeth o achosi anafiadau difrifol wrth yrru'n beryglus.
Dwy ferch yn yr ysbyty
Mae Heddlu'r De yn chwilio am feic modur Husqvana fel rhan o'u hymchwiliad.
Fe gafodd sgwter trydan pinc ei ddarganfod yn y fan a'r lle.
“Mae ein meddyliau gyda theuluoedd y ddwy ferch sydd wedi’u hanafu’n ddifrifol yn yr ysbyty," dywedodd y Prif Arolygydd Jonathan Fairhurst.
Fe ofynnodd i bobl "beidio a dyfalu" ynghylch y digwyddiad wrth apelio am unrhyw wybodaeth.