Pencampwriaethau Rasio Ffordd yn hwb i economi Ceredigion
Bydd 10 crys pencampwr cenedlaethol yn y fantol dros dri diwrnod o rasio
- Cyhoeddwyd
Mae disgwyl i Bencampwriaethau Rasio Ffordd Genedlaethol Lloyds British Cycling 2025 gael effaith gadarnhaol ar economi Ceredigion tra'n cynyddu'r diddordeb mewn seiclo, yn ôl busnesau a phobl leol y sir.
Bydd seiclwyr elitaidd o Gymru ynghyd â rhai o enwau mawr seiclo ffyrdd ym Mhrydain yn rhan o'r cystadlu.
Bydd y digwyddiad yn cael ei gynnal rhwng 26-29 Mehefin o amgylch ardaloedd Aberaeron ac Aberystwyth, gyda 10 crys pencampwr cenedlaethol i'w ennill.
Mae Cyngor Sir Ceredigion yn gobeithio y bydd cynnal y digwyddiad hwn yn "ysbrydoli beicwyr ifanc a fydd yn gallu gweld eu harwyr ar waith".
Bydd y rasys profion amser yn dechrau am 09:00 ac yn gorffen am 17:00
Bydd y digwyddiad yn dechrau gyda'r ras yn erbyn y cloc am 09:00 fore Iau 26 Mehefin ym mhentref Ffos-y-ffin.
Yma bydd y merched elît, merched dan 23 a'r categori dynion dan 23 yn seiclo un lap a thri chwarter i gyrraedd pellter o 27km, tra bydd y dynion elît yn seiclo dwy lap a thri chwarter i gyrraedd pellter o 41km.
Bydd y llwybr, sydd wedi ei ddisgrifio gan British Cycling fel un "heriol", yn teithio drwy Giliau Aeron a Llanerchaeron cyn gorffen ar Heol Llyswen yn Aberaeron.
Donna Regan yw rheolwr Gwesty'r Castell, Aberaeron
Yn ôl rheolwr Gwesty'r Castell yn y dref, Donna Regan, 39, mae'n "gyffrous" bod y digwyddiad yn dod i'r ardal.
Dywedodd bod y gwesty "yn llawn" drwy gydol yr wythnos.
"Gobeithio bod y bobl sy'n dod i aros yn dod i supporto'r bobl sy'n seiclo.
"Mae hwnna'n dod â lot o fusnes i ni nawr gyda'r gwesty a phopeth."
Ychwanegodd: "Mae e'n neis bod e'n dod i Aberaeron.
"Fi'n gwybod mae e'n mynd ymlaen i Aberystwyth wedyn, ond mae'n neis bod y seiclo'n dechrau yn yr ardal hyn, bod e'n dechrau yn Ffos-y-ffin a bod e'n mynd rownd Aberaeron a'r rhewlydd sy'n dod mewn tuag at Aberaeron."
Bydd oedi posib ar hyd rhai ffyrdd yn y sir
Bydd nifer o'r prif ffyrdd o amgylch Aberaeron ac Aberystwyth ar gau am gyfnodau penodol yn ystod y tri diwrnod o rasio.
Bydd y ras gylchdaith yn cael ei chynnal ddydd Gwener 27 Mehefin a'r ras ffordd ddydd Sul 29 Mehefin, y ddau yn Aberystwyth a'r cyffiniau.
Mae disgwyl i'r beicwyr gyrraedd cyflymder o 50mya mewn ambell fan yn ystod y ras.
Ymysg rhai o'r beicwyr o Gymru sydd wedi cofrestru i gystadlu mae Owain Doull, y chwiorydd Zoe Backstedt ac Elynor Backsted, Elinor Barker a Megan Barker.
Yn ôl British Cycling, er ei fod wedi cofrestru, ni fydd y pencampwr cenedlaethol ac Olympaidd ar ddau achlysur ac enillydd Tour de France 2018, Geraint Thomas yn cystadlu bellach.
Mae Dafydd, Arwel a Gwion yn teimlo'n "lwcus iawn" i gael gweld y digwyddiad
Bydd aelodau Clwb Seiclo Caron ymysg y dorf fydd yn gwylio'r digwyddiad.
"Mae'n bleser i watcho nhw" meddai Dafydd Richards, 51.
"Maen nhw tipyn gwell na beth ydyn ni. Ma' pa mor fast maen nhw'n mynd yn anhygoel rili," meddai.
Ychwanegodd Arwel Jones, 27: "Fi'n meddwl bod e'n beth gwych i'r gymuned leol hefyd.
"Mae e'n mynd i ddod â lot o arian a phobl mewn i'r ardal".
Yn ôl Gwion James, 50, gall y digwyddiad annog eraill i feithrin diddordeb mewn seiclo.
"Yn sgil gemau Olympaidd Llundain 2012 dechreuodd y clwb yma, blwyddyn ar ôl hynny.
"Ni'n mynd o nerth i nerth a bydd digwyddiadau fel hyn yn Aberaeron ac Aberystwyth dros y penwythnos yn creu diddordeb gyda seiclwyr o bob oedran ac yna'n dod i seiclo gyda chlybiau."
Mae Dwynwen Davies newydd ymuno â chlwb seiclo i fenywod yn Aberystwyth
Gyda chroeso i gefnogwyr wylio ar unrhyw un o'r llwybrau, mae busnesau lleol yn rhagweld penwythnos prysur.
"Ni 'di cael lot o bobl yn enquireo am bike hires dros y weekend," meddai Dwynwen Davies, 23, o siop feics Beiciau Afan, Aberystwyth.
"Fi'n credu bod nhw eisiau joino mewn gyda'r buzz a beicio rownd a gwylio'r bobl ar wahanol parts o'r routes.
"Ni'n cynnig stondin lawr ar y prom dydd Sadwrn ac mae gyda ni mecanic yn mynd lawr hefyd i fixo beics a helpu pobl lleol i ddysgu mwy am bethau beicio."
'Ysbrydoli beicwyr ifanc'
Dywedodd y Cynghorydd Clive Davies, aelod cabinet dros yr economi ac adfywio, Cyngor Sir Ceredigion: "Rydym wrth ein boddau y bydd Ceredigion yn cynnal y Pencampwriaethau Beicio Cenedlaethol eleni.
"Bydd yn gyfle i ni arddangos Ceredigion fel lle gwych i feicwyr ac ar gyfer twristiaeth, lle byddwch yn profi golygfeydd gwych – ein harfordir, cefn gwlad a'r mynyddoedd.
"Mae gan Geredigion hanes balch o ran cynhyrchu beicwyr elitaidd gan gynnwys Josh Tarling, Stevie Williams a Gruff Lewis ac rydym yn gobeithio y bydd cynnal y digwyddiad hwn yn ysbrydoli beicwyr ifanc a fydd yn gallu gweld eu harwyr ar waith.
"Bydd cynnal y digwyddiad hwn yn darparu buddion economaidd sylweddol i'r Sir ac edrychwn ymlaen at groesawu'r Pencampwriaethau i Geredigion."