Antur Waunfawr: Angen cefnogaeth wedi bil Yswiriant Gwladol uchel

Dywed Ellen Thirsk, Prif Weithredwr Antur Waunfawr, nad yw'r sefyllfa ariannol bresennol yn gynaliadwy

Mae Prif Weithredwr Antur Waunfawr, Ellen Thirsk, wedi galw am gefnogaeth frys gan Lywodraeth y DU ar ôl cael gwybod y bydd y ganolfan yn derbyn bil yswiriant gwladol o dros £71,000.

Mae'r ganolfan, sy'n helpu pobl ag anableddau dysgu, yn dweud eu bod yn wynebu pwysau ariannol mawr.

Mae Aelod Arfon yn y Senedd, Sian Gwenllian hefyd yn pryderu ac yn dweud bod nifer o ganolfannau eraill sy'n helpu pobl fregus yn wynebu heriau ariannol tebyg.

Dywed Llywodraeth y DU eu bod yn "cefnogi ein helusennau trwy gyfundrefn dreth arloesol, a llynedd yn unig roddwyd £6biliwn mewn cymorth i'r sector".

Her seiclo 40 milltir i ddathlu pen-blwydd deugain oed Antur Waunfawr

Wrth siarad ar Dros Frecwast fore Gwener, dywedodd Ellen Thirsk fod y broblem hon am gael "effaith sylweddol" ar y ganolfan a'r sector.

"Mae amdan mwy na ni - mae mudiadau ar draws Cymru, mudiadau cymunedol trydydd sector sy'n rhoi gwasanaethau hanfodol ac yn gwneud lot o waith ataliol [yn dioddef]," meddai

Dywedodd nad oes modd iddyn nhw godi mwy o dâl ar rieni am y gofal gan eu bod yn y sector gyhoeddus.

"Sut fedrwch chi feddwl fod hyn yn gynaliadwy? Dydi o ddim, 'da ni mewn her economaidd sylweddol yn barod," ychwanegodd.

'Dydi o ddim yn gwneud synnwyr'

Aeth ymlaen i ddweud ei bod yn "derbyn bod yr esgid yn gwasgu a bod gwasanaethau iechyd yn hanfodol" ond "ar ddiwedd y dydd pam fod gofal cymdeithasol a gofal yn y gymuned... yn cael eu cosbi?" gofynnodd.

"Dydi o ddim yn gwneud synnwyr i mi."

Dywedodd y bydd yn rhaid iddi edrych ar sut y bydd y bil enfawr yma yn effeithio ar sut mae'r ganolfan yn rhedeg ac o bosib bod yn rhaid ystyried cwtogi staff.

"Dwi ddim isho codi pryder efo staff Antur Waunfawr… o ran staff gofal does gennym ni'm dewis ond darparu gofal.

"Da chi'n gorfod edrych ar bob swydd arall sy'n codi."

Dywedodd ei bod yn poeni am ddiffyg cyfleoedd gwaith i bobl ifanc yr ardal oherwydd yr hinsawdd economaidd: "Lle mae'r bobl ifanc ma'n mynd i fynd? Mae'n gylch economaidd".

Mae sefydliadau tebyg eisoes wedi rhybuddio y bydd yn rhaid cwtogi neu gael gwared ar wasanaethau yn sgil bwriad Llywodraeth y DU i godi treth Yswiriant Gwladol i gyflogwyr.

Mewn datganiad, dywedodd llefarydd ar ran Llywodraeth y DU: "Rydym yn cefnogi ein helusennau trwy gyfundrefn dreth arloesol, a llynedd yn unig rhoddwyd £6biliwn mewn cymorth i'r sector.

"Mae hyn yn cynnwys eithriadau o dalu trethi busnes yn Lloegr - pwer sydd wedi'i ddatganoli i Lywodraeth Cymru a fydd yn derbyn setliad o 21 biliwn o bunnoedd, y swm mwyaf erioed."