Cae Sioe Môn fydd cartref Eisteddfod yr Urdd 2026

Mae Urdd Gobaith Cymru wedi cadarnhau mai ar gae Sioe Môn y bydd yn cynnal yr Eisteddfod flynyddol yn 2026.

Daeth cadarnhad fis Mehefin y llynedd bod yr ŵyl yn dychwelyd i Ynys Môn - ac i'r un safle, ger pentref Gwalchmai - ag yn 2004.

Mae'r paratoadau eisoes wedi dechrau ar gyfer y digwyddiad, a fydd yn cael ei gynnal rhwng 25 a 31 Mai 2026, yn ôl cadeirydd y pwyllgor gwaith lleol.

Dywedodd Manon Wyn Williams: “Mae ugain mlynedd ers y cynhaliwyd Eisteddfod yr Urdd ar Ynys Môn ddiwethaf, felly rydym yn edrych ymlaen yn eiddgar at ei chroesawu eto yn 2026."

"Nid mater bach yw cynnal gŵyl genedlaethol fel hon ac mae llawer o waith i’w wneud eto dros y ddwy flynedd sydd i ddod," ychwanegodd Ms Williams.

“Y cam nesaf yw sefydlu’r pwyllgorau apêl ymhob cymuned ledled yr Ynys a fydd yn gyfrifol am drefnu gweithgareddau i godi ymwybyddiaeth yn ogystal ag arian.

"Byddai’n wych gweld cynifer â phosibl yn ymuno â’r pwyllgorau hyn a hoffem weld holl blant a phobl ifanc yr Ynys yn cael y cyfle i fod yn rhan o’r trefniadau er mwyn sicrhau y bydd hi’n Eisteddfod i’w chofio – mae croeso i bawb.”

Gan groesawu'r cyhoeddiad, dywedodd arweinydd Cyngor Sir Ynys Môn, Llinos Medi: “Braf iawn yw clywed fod cae Sioe Môn wedi ei ddewis yn gartref i Eisteddfod yr Urdd 2026.

"Mae’r Ynys a’i thrigolion yn edrych ymlaen yn eiddgar at gynnal yr ŵyl arbennig yma.

"Bydd yn gyfle i ddathlu ac ymfalchïo yn ein Cymreictod ac i estyn croeso cynnes i blant a phobl ifanc o bob rhan o Gymru i’n Sir ni.

"Byddwn yn parhau i gydweithio â’r Urdd er mwyn sicrhau bod ni’n gwneud y mwyaf o’r cyfle rhagorol yma i ni ddangos Ynys Môn ar ei gorau.”

Fe ddaeth y gwahoddiad swyddogol i wahodd Eisteddfod yr Urdd 2026 i Ynys Môn yn ystod cyfarfod yn Llangefni y llynedd

Mae trefnwyr yn galw nawr am enwebiadau ar gyfer Llywyddion y Dydd - unigolion sydd "yn ffigyrau adnabyddus lleol, sy’n cynrychioli’r ynys ac yn esiampl i blant a phobl ifanc heddiw".

Hefyd maen nhw'n gwahodd enwebiadau am "unigolion sydd wedi rhoi oes o gyfraniad i’r Urdd, trwy wirfoddoli, cefnogi neu hyfforddi" i gael eu hystyried fel Llywyddion Anrhydeddus Eisteddfod yr Urdd Ynys Môn 2026.

Ardal Maldwyn sy'n croesawu'r Eisteddfod eleni, ar Fferm Mathrafal ger Meifod rhwng 27 Mai a 1 Mehefin.

Parc Margam fydd cartref yr ŵyl yn 2025, wrth i'r Eisteddfod ddychwelyd i Gastell-nedd Port Talbot am y tro cyntaf ers 2003.