Clydach: Dyn yn cyfaddef dynladdiad menyw
Roedd Wendy Buckney yn cadw ceffylau ac wedi sefydlu Canolfan Farchogaeth Pen-y-Fedw, Abertawe
- Cyhoeddwyd
Mae dyn 57 oed o Glydach wedi cyfaddef dynladdiad menyw 71 oed, ond mae’n gwadu ei llofruddio.
Mewn gwrandawiad yn Llys y Goron Abertawe ddydd Mercher fe blediodd Brian Whitelock yn euog i ddynladdiad Wendy Buckney.
Cafodd corff Ms Buckney, oedd wedi ymddeol, ei ddarganfod y tu allan i'w chartref yng Nghlydach, Abertawe ym mis Awst 2022.
Mae Mr Whitelock wedi ei gyhuddo o un achos o lofruddiaeth, ac un cyhuddiad o ddynladdiad.
Plediodd yn ddieuog i lofruddiaeth Ms Buckney.
Gohirio'r achos
Dywedodd yr erlyniad, Michael Jones KC, wrth y llys nad oedd yn derbyn y ple o ddynladdiad, ac mae disgwyl i achos llys ddechrau ym mis Tachwedd.
Bydd gwrandawiad adolygu cyn yr achos yn cael ei gynnal ar 5 Gorffennaf, gyda’r achos ei hun i ddechrau ar 12 Tachwedd.
Dywedodd y Barnwr Martin Griffiths wrth y llys y bydd hi’n "siom fawr i lawer" bod yr achos wedi’i ohirio, ond fod angen hynny oherwydd y newid ple.
Mae Mr Whitelock yn parhau yn y ddalfa.