Cyngor Gwynedd yn dweud wrth ddyn am beidio glanhau arwyddion

Mae Dylan Edwards wedi glanhau'r arwydd "diawledig o fudr" ger Ffordd Penrhos ar gyrion Bangor

Mae Cyngor Gwynedd wedi dweud wrth ddyn am beidio â glanhau arwyddion ffordd, ar ôl iddo dderbyn clod ar-lein am wneud.

Dywedodd Dylan Edwards, 56 o Fethesda, iddo gael ei ysgogi i lanhau arwyddion ar ôl synnu ar ba mor "ddiawledig o fudr" oedden nhw wrth yrru heibio.

Mae wedi derbyn cryn dipyn o glod ar-lein wedi iddo rannu lluniau o'i waith ar yr arwyddion ger y gylchfan yn Nhreborth ar gyrion Bangor.

Mae'n dweud ei fod wedi cael ceisiadau i lanhau arwyddion budr eraill yn y sir, ond ychwanegodd ei fod yn poeni am ymateb y cyngor i'w waith gwirfoddol.

Dywedodd llefarydd ar ran Cyngor Gwynedd eu bod yn "gwerthfawrogi cyfraniad" Mr Edwards ond mai "swyddogion sydd wedi derbyn hyfforddiant priodol ddylai gario allan unrhyw waith o fewn ffiniau'r briffordd gyhoeddus".

Mae Dylan Edwards yn dweud fod nifer o bobl wedi gofyn iddo lanhau arwyddion eraill yn yr ardal

Dywedodd Mr Edwards ei fod wedi dechrau glanhau arwyddion ffordd budr rhyw bedair blynedd yn ôl wedi iddo ddechrau ei fusnes glanhau ffenestri a chwteri.

"Nes i ddechrau llnau seins pan o'n i'n cael adegau distaw rhwng jobsys, ond nes i stopio ar ôl i rywun o'r cyngor mwy neu lai dd'eud i fi beidio," meddai.

"Oedd pobl wrth eu bodd yn cael seins glan - doedd dim ots genna i, o'n i m'ond yn 'neud o yn fy amser rhydd ond nes i roi'r gorau idda fo."

Mae Dylan Edwards wedi derbyn cryn dipyn o glod ar-lein am ei waith

Ond ar ôl pedair blynedd o gadw draw oddi wrth arwyddion ffordd budr, dywedodd Mr Edwards iddo ymestyn am y jet washer unwaith eto ar ôl bod yn gyrru o amgylch ei ardal leol yn ddiweddar.

"Arglwydd mawr, oedd 'na olwg arnyn nhw," meddai.

"Ti'm yn gweld yr arwydd na dim byd - oedden nhw mor wyrdd.

"Nes i basio nhw tua dwsin o weithia dros ryw dri mis, a nes i feddwl 'fedra i ddim madda'.

"So pan es i heibio dydd Mawrth, es i nôl rownd y roundabout a stopio ar y pafin i neud nhw - 'naeth o m'ond gymryd ryw 10 munud."

Rhai arwyddion yn 'ddiawledig o fudr'

Mae pobl "wrth eu bodd" gyda'i waith, meddai Mr Edwards, gan ychwanegu bod nifer o bobl wedi ei holi am lanhau mwy o arwyddion yn y dyfodol.

"Ar ôl i fi 'neud o, oedd lot o bobl yn commentio yn deud 'da iawn' a bob dim.

"Dwi'n hapus i 'neud nhw yn fy amser sbâr rhwng jobs, ond dwi'n poeni 'chydig bach am be' 'sa'r cyngor yn d'eud os 'swn i'n cario 'mlaen.

"Mae rhei o'r seins 'ma'n ddiawledig o fudr - i feddwl fod o m'ond yn cymryd rhyw 10 munud, chwarter awr i 'neud.

"Os ma'r cyngor isio rhywun i sortio nhw, geith nhw roi'r cynnig cynta' i fi!"

'Sefyllfa beryglus' i aelodau'r cyhoedd

Dywedodd llefarydd ar ran Cyngor Gwynedd: "Rydym yn gwerthfawrogi cyfraniad aelodau o'r cyhoedd tuag at wella'r amgylchedd lleol ond mae diogelwch pawb sydd yn defnyddio'r priffyrdd yn flaenoriaeth i ni fel cyngor.

"Am y rheswm yma ni ddylasai aelodau'r cyhoedd roi eu hunain mewn sefyllfa beryglus ar unrhyw adeg a phwysleisir mai ond swyddogion sydd wedi derbyn hyfforddiant priodol ddylai gario allan unrhyw waith o fewn ffiniau'r briffordd gyhoeddus.

"Byddwn yn cynghori unrhyw un sydd yn dod ar draws problem fyddai yn cynnwys adrodd am arwyddion budr, i gysylltu gyda'r cyngor."