Dynes gafodd bum strôc a gwaedlif ar yr ymennydd yn nofio Llyn Padarn

Heather Hughes cyn cychwyn ar ei thaith yn y llyn yn Llanberis

Mae dynes o Fôn ddechreuodd nofio gwyllt ar ôl cael gwaedlif ar yr ymennydd a pum strôc wedi nofio hyd Llyn Padarn i gasglu arian at achos da.

Fe gafodd Heather Hughes, o Lanfairpwll, ei tharo’n ddifrifol wael bum mlynedd yn ôl gan dreulio wythnosau yn ysbyty arbenigol Walton, Lerpwl, ac Ysbyty Gwynedd, Bangor.

Ond wedi i’w ffrind ei pherswadio i ddechrau nofio gwyllt fel rhan o’i hadferiad mae wedi bod yn mynd yn gyson drwy’r flwyddyn - a nawr wedi llwyddo i nofio am dros ddwyawr yn y llyn ger Llanberis.

"Do’n i erioed wedi sylweddoli pa mor hir ydi Llyn Padarn,” meddai.

"Dwi ddim yn athlete, felly i 'neud hynny roedd o’n her i fi. I gael pobl pen arall yn cheerio pan nesh i gyrraedd, roedd o’n emosiynol iawn."

Dywedodd Heather Hughes ei bod yn nerfus iawn ar fore'r sialens cyn iddi ddechrau nofio

Roedd Ms Hughes, sy’n 56 oed, yn gadael Venue Cymru yn Llandudno ar 15 Ebrill 2019 pan gafodd boen dychrynllyd yn ei phen.

"Chesh i ddim rhybudd - dim byd o gwbl," meddai. "A nesh i dd'eud yn syth ‘dwi’n meddwl mod i 'di cael brain haemorrhage’."

Aeth i’w gwely gyda thabledi lladd poen cyn cael ei pherswadio i fynd i Ysbyty Gwynedd, Bangor.

O fewn dim roedd hi’n cael ei gyrru ar frys i Lerpwl lle achubodd tîm meddygol Walton ei bywyd.

Cafodd wybod bod ganddi hydrocephalus, pan mae hylif yn casglu ar yr ymennydd, a chael triniaeth cyn dychwelyd i Fôn pum wythnos yn ddiweddarach.

Nofio yn hwb i iechyd meddwl

O fewn wythnosau roedd hi'n ôl yn Ysbyty Gwynedd ar ôl cael pedwar strôc.

Fe gafodd un arall yn 2021 ac roedd y cyfan yn effeithio’i hiechyd corfforol a meddyliol.

"Roedd 'na ffrind wedi gweld 'mod i angen help a dyma hi’n dweud ‘ti’n dod i nofio’,” meddai.

"Dwi’n cofio mynd fewn i’r môr am y tro cynta’ a gweiddi ‘o ma’n oer’... a dyma fy ffrind yn d'eud 'gwranda, ti wedi geni tri o blant jest anadla fewn ac allan trwy dy geg a fyddi di’n iawn'.

"Roedd hi’n gwybod y bydda fo’n llesol. Ti’n rhoi dy ben o dan y dŵr a ti’n cael yr endorphins hit yma. Dwi wrth fy modd.

"Ma' 'ngŵr yn gwybod os dwi heb fod am ychydig o ddyddiau."

Heather Hughes - gyda'i chwaer Nici Hughes yn y caiac er mwyn diogelwch - yn mynd i gyfeiriad Llanberis

Bellach mae hi’n mynd pedair gwaith yr wythnos, fel arfer i draethau dwyrain Môn, ac yn nofio drwy’r flwyddyn heb wisg cadw’n gynnes.

Ar ôl nofio lled Llyn Padarn yn ddiweddar fe benderfynodd nofio’r 3.2 cilomedr o bont Penllyn, Brynrefail, i ben arall y llyn yn Llanberis i gasglu arian i elusen SHINE.

Dros yr haf roedd hi’n ymarfer tra ar ei gwyliau yn Corfu gan gynyddu ei hamser yn y pwll nofio bob dydd er mwyn cyrraedd ei tharged.

Ond mae nofio mewn pwll ar un o ynysoedd Groeg yn yr haf yn wahanol i lyn dwfn yn Nyffryn Peris wrth i’r hydref agosáu.

Heather Hughes gyda'i theulu ar ôl cwblhau'r sialens. Hyd yma mae wedi casglu £1,500 i elusen Shine

"Mae dŵr y môr yn ysgafnach oherwydd yr halen - a do’n i’m yn gwybod hynny tan i rywun dd'eud wrtha i," meddai.

"Roedd y llyn yn choppy pan nesh i gyrraedd hanner ffordd a’r gwynt yn erbyn fi. Ar adegau do’n i’m yn meddwl mod i'n symud o gwbl.

"Pan nesh i gerdded allan 'nath fy nghoesau i jest fynd - roeddan nhw fel jeli! Ond nesh i 'neud o."