Heddlu heb gyfrannu at farwolaeth dynes yn y ddalfa yng Nghaernarfon

Bu farw Helen Williams tra yn y ddalfa yn ardal Maesincla, Caernarfon ym mis Mai 2024

Mae ymchwiliad gan Swyddfa Annibynnol Ymddygiad yr Heddlu (IOPC) wedi dod i'r casgliad nad oedd swyddogion wedi cyfrannu at farwolaeth dynes tra yn y ddalfa yng Nghaernarfon "mewn unrhyw ffordd".

Cafodd Helen Williams ei harestio am 10:20 ar 23 Mai 2024 (dydd Iau) y tu allan i eiddo ym Mangor, cyn cael ei gyrru i orsaf heddlu Caernarfon.

Roedd Ms Williams yn y ddalfa am tua 33 awr yn aros i ymddangos yn y llys.

Yn ystod yr amser yma roedd hi dan oruchwyliaeth gyson gan staff yn y ddalfa a chafodd ei gweld gan weithwyr iechyd proffesiynol.

Ond cafodd y ddynes, a oedd yn ei 40au, ei tharo'n ddifrifol wael ar ddydd Gwener, 24 Mai ac er gwaethaf ymdrechion parafeddygon a swyddogion heddlu, bu farw ychydig cyn 17:30.

Daeth rheithgor mewn cwest yng Nghaernarfon ddydd Mercher i'r casgliad fod y farwolaeth yn ymwneud a chyffuriau.

Fe ddaeth ymchwiliad yr IOPC i'r casgliad bod swyddogion Heddlu Gogledd Cymru wedi gweithredu yn unol â pholisïau a gweithdrefnau wrth drin y ddynes yn y ddalfa.

Dywed Cyfarwyddwr IPSO Derrick Campbell: "Ar ddiwedd ein hymchwiliad ym Mehefin 2025, ni wnaethon ganfod unrhyw dystiolaeth oedd yn awgrymu fod yr heddlu wedi cyfrannu mewn unrhyw ffordd at farwolaeth Ms Williams.

"Fe wnaethom ganfod fod y swyddogion wedi ymddwyn yn unol â'r gweithdrefnau wrth ei harestio ac wrth ei chadw yn y ddalfa."

Fe gadarnhaodd archwiliad post mortem fod Ms Williams wedi marw yn sgil cymhlethdodau yn ymwneud â defnydd o gyffuriau.