Anaf difrifol i ddyn wedi digwyddiad ar safle Tata
Mae'r Awdurdod Iechyd a Diogelwch wedi cael gwybod am y digwyddiad
- Cyhoeddwyd
Mae dyn 46 oed wedi ei gludo i'r ysbyty gydag anafiadau allai newid ei fywyd ar ôl digwyddiad ar safle gwaith dur ym Mhort Talbot.
Fe gafodd y gwasanaethau brys eu galw i'r "digwyddiad diwydiannol" yn Tata Steel tua 20:15 nos Iau.
Dywedodd Heddlu'r De fod y dyn wedi ei gludo mewn ambiwlans i Ysbyty Athrofaol Cymru yng Nghaerdydd.
Mae'r Awdurdod Iechyd a Diogelwch wedi cael gwybod am y digwyddiad.
Dywedodd llefarydd ar ran Tata Steel: "Gallwn gadarnhau bod un o'n gweithwyr wedi bod yn rhan o ddigwyddiad ar ein safle ym Mhort Talbot.
"Fe wnaeth ambiwlans fynychu, ac mae'r person a anafwyd yn parhau yn yr ysbyty yn derbyn triniaeth.
"Rydym yn dymuno gwellhad llawn a buan iddo."