Teyrngedau i ddau ddyn ifanc fu farw ar yr A40

Bu farw Aled Coleman (chwith) ac Aled Bowen (dde) yn dilyn gwrthdrawiad yn sir Benfro dydd Sul

Mae teuluoedd dau ddyn ifanc a fu farw mewn gwrthdrawiad yn Sir Benfro dros y penwythnos wedi rhoi teyrnged iddyn nhw.

Bu farw Aled Coleman, 23 oed o Scleddau, ac Aled Bowen, 18, yn dilyn gwrthdrawiad un cerbyd ar yr A40 rhwng Hwlffordd ac Abergwaun yn oriau mân y bore ddydd Sul.

Bu farw'r ddau a oedd yn teithio yn y car - Volkswagen Polo arian - yn y fan a'r lle.

Dywedodd teulu Aled Coleman ei fod yn berson "gofalgar, caredig a llawn hwyl, fydd yn cael ei golli'n fawr gan ei deulu cyfan".

Dywedodd teulu Aled Bowen eu bod "wedi'n llorio" ar ôl colli "mab annwyl, brawd ac ewythr ymroddedig, a ffynhonnell o gariad a nerth i bawb a oedd yn ddigon ffodus i'w adnabod".

Mae'r llu'n apelio ar unrhyw un a welodd y gwrthdrawiad neu sydd â lluniau dashcam i gysylltu â nhw.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.