Caerdydd: Myfyrwyr yn anfodlon a cherbydau mawr i dalu mwy am barcio

Mae Ellie Tudor yn dweud bod y gallu i yrru car yn hanfodol ar gyfer ei hastudiaethau

Mae Cyngor Caerdydd yn gobeithio y bydd cynllun parcio newydd yn gwella ansawdd aer yn y brifddinas ac yn lleihau anghyfleustra i drigolion lleol.

Fel rhan o'r cynllun, y mae'r cabinet wedi cytuno iddo ddydd Iau, fe fydd y brifddinas yn cael ei rhannu'n dair ardal - canol y ddinas, yr ardal fewnol a'r ardal allanol.

Fydd dim modd i bobl sy'n byw yng nghanol y ddinas gael trwydded parcio, ac er mai dyma oedd y bwriad gwreiddiol ar gyfer tai myfyrwyr hefyd, yn dilyn gwrthwynebiad mae'r cyngor nawr yn dweud y bydd modd i un person ymhob tŷ gael trwydded parcio.

Yn rhan o'r cynllun hefyd mi fydd cost cael trwyddedau parcio ar gyfer cerbydau mawr fel SUVs - sy'n pwyso mwy na 2.4 tunnell - yn codi.

Dywedodd y cyngor bod y "cerbydau trymach hyn fel arfer yn cynhyrchu mwy o allyriadau" ac yn "peri risg sylweddol uwch pe bai gwrthdrawiad traffig ffordd".

Mae cynllun diweddaraf y cyngor yn rhannu Caerdydd yn dair ardal:

• Canol y ddinas - sy'n cynnwys hanner ardal Cathays

• Yr Ardal fewnol - sy'n cynnwys gweddill Cathays, rhannau o Grangetown, Tre-biwt, Glan-yr-afon, Plasnewydd ac Adamsdown.

• Yr Ardal allanol - sy'n cynnwys gweddill Grangetown, Tre-biwt, Plasnewydd, Adamsdown, Treganna, Sblot, Gabalfa a rhan o Ben-y-lan.

Yn ogystal â chyfyngu ar nifer y trwyddedau y bydd modd eu hawlio ymhob tŷ - bydd rheolau llym ynglŷn â faint o drwyddedau ymwelwyr sydd ar gael i dai myfyrwyr hefyd.

'Dydi cael car ddim yn luxury'

Mae Ellie Tudor yn dilyn cwrs addysg ym Mhrifysgol Met Caerdydd.

Mae hynny'n golygu ei bod hi'n treulio wythnosau ar y tro mewn ysgolion cynradd.

"Heb fy nghar i fyddwn i methu â chyrraedd placements," meddai.

"Dwi'n byw hefo saith o ferched ac allan o'r saith ohonom ni, mae pump ohonom ni'n gwneud yr un cwrs.

"Mae 'na siawns bo' ni gyd ar leoliad gwahanol yn ne Cymru ac angen teithio mewn car gwahanol. D'i o ddim yn luxury cael o, mae'n rhaid cael o ar gyfer y cwrs."

"Dydy'r system drafnidiaeth gyhoeddus ddim yn ddigon da i fedru ymddiried ynddo," meddai Is-Lywydd y Gymraeg yn Undeb Myfyrwyr Prifysgol Caerdydd

Mae Undeb Myfyrwyr y brifysgol yn poeni hefyd.

Dywedodd Cynwal ap Myrddin, Is-Lywydd y Gymraeg: "Cosbi myfyrwyr maen nhw'n neud hefo'r drefn newydd 'ma.

"Mae gennym ni lwyth o fyfyrwyr sy'n astudio cyrsiau meddygol o ddoctoriaid i nyrsys i fydwragedd - ac mae rhain i gyd yn gorfod mynd ar leoliad mewn ysbytai ledled Cymru.

"Dydy'r system drafnidiaeth gyhoeddus ddim yn ddigon da i fedru ymddiried ynddo, yn enwedig i'r rheiny sy'n gorfod gweithio shifftiau yn hwyr yn y nos.

"Yn sgil costau byw mae'n rhaid i fwy o fyfyrwyr nag erioed weithio, boed hynny'n mynd adref i orllewin Cymru neu dros y ffin i Loegr mae pobl angen eu ceir o ddydd i ddydd er mwyn fforddio byw yng Nghaerdydd."

Beth yn union yw'r cynlluniau?

Yn rhan o'r cynllun mi fydd y cyngor yn cynyddu'r gost o gael trwyddedau parcio ar gyfer cerbydau mawr fel SUVs - sy'n pwyso mwy na 2.4 tunnell.

Pwysleisiodd Arweinydd Cyngor Caerdydd, Huw Thomas, fod ceir mawr yn fwy tebygol o achosi anaf "neu hyd yn oed lladd".

"Os 'da chi'n blentyn dan 10 oed chi dair gwaith mwy tebygol o gael eich lladd os gewch chi'ch bwrw gan y cerbydau yma na gan gar normal," meddai.

Dywedodd llefarydd ar ran y cyngor: "Mae cerbydau trymach fel arfer yn cynhyrchu mwy o allyriadau, yn achosi mwy o draul ar ffyrdd, ac yn peri risg sylweddol uwch pe bai gwrthdrawiad traffig ffordd.

"Y gost ar hyn o bryd ar gyfer trwydded parcio preswyl ar gyfer y cerbyd cyntaf yng Nghaerdydd yw £35 y flwyddyn.

"Hyd yn oed pe bai'r gost yn cael ei dyblu ar gyfer cerbydau dros 2.4 tunnell, mi fyddai'r gost dal yn ddibwys o'i gymharu â faint mae'n costio i brynu cerbydau o'r fath."

Esboniodd y byddai'r refeniw sy'n cael ei gynhyrchu o'r tâl yma'n cael ei ddefnyddio er mwyn helpu i weithredu'r cynllun parcio newydd ar draws y ddinas.

Fe gynhaliodd y cyngor ymgynghoriad cyhoeddus ar y polisi hwn.

Fe ymatebodd dros chwe mil o bobl ac un o'r cwestiynau oedd 'ydych chi'n cytuno y dylai cerbydau mawr (dros 2,400kg) dalu mwy am drwyddedau, gan eu bod yn cymryd mwy o le na cherbydau llai?'

Roedd 65.9% yn cytuno, gan gynnwys 40.2% oedd yn cytuno'n gryf.

Ar hyn o bryd mae'n costio £35 y flwyddyn i gael trwydded parcio preswyl ar gyfer y cerbyd cyntaf yng Nghaerdydd

Yng ngweddill y cynllun mae sôn y bydd yn rhaid i feiciau modur gael trwyddedau hefyd ond fe fydd yna drwyddedau arbennig ar gael i weithwyr iechyd a gofalwyr.

Fe fydd y newidiadau yn cael eu cyflwyno'n raddol dros y deng mlynedd nesaf.

Yng nghanol y ddinas fe fydd gyrwyr anabl, tacsis, bysiau a cherbydau sy'n dosbarthu nwyddau yn cael blaenoriaeth.

Fe fydd yna reolau parcio mewn grym drwy'r dydd bob dydd a fydd yna ddim trwyddedau parcio i drigolion.

Yn yr ardal fewnol fe fydd yna amrywiaeth o barcio ar gael ond bydd yn rhaid talu rhwng 08:00 a 22:00 bob dydd.

Fydd yna ddim trwyddedau parcio i fusnesau ac fel rheol fydd dim modd llwytho rhwng 08:00 a 22:00.

Yn yr ardal allanol fe fydd yna amrywiaeth o barcio ar gael ond bydd cyfyngiadau yn cael eu cyflwyno ar ôl ymgynghori gyda phobl leol.

Fe fydd yr oriau mae'n rhaid talu am barcio yn amrywio ond bydd yn rhaid gwneud hynny hyd at 18:30.

Mae Nia Cooper yn gweld y newidiadau yn annog rhagor o bobl i weithio o adref

Roedd 6,381 o bobl wedi ymateb i ymgynghoriad y cyngor.

Y cynigion mwyaf dadleuol oedd cael gwared â thrwyddedau parcio yng nghanol y ddinas, ymestyn oriau talu am barcio yn yr ardal fewnol a dim ond cynnig trwyddedau i fusnesau yn yr ardal allanol.

Mae Nia Cooper yn gyrru i'w gwaith yng nghanol y ddinas.

"Fi'n credu bydd hwnna'n annog pobl i weithio o gartref ar adeg pan mae busnesau'n trio cael gweithwyr i ddychwelyd i swyddfeydd," meddai.

"Ar y foment dyw trafnidiaeth gyhoeddus ddim yn ddigon da, mae bysys yn gorffen yn gynnar yn y nos. Mae tacsis ar gael ond does dim digon o arian gyda pawb i fynd mewn tacsi drwy'r amser."

Mae Rhys Davies yn dweud ei fod yn ffodus fod maes parcio yn y swyddfa ble mae'n gweithio

Dyw'r newidiadau ddim yn debyg o gael llawer o effaith ar Rhys Davies sy'n gweithio yn y Bae.

"Fi'n lwcus achos does dim rhaid i fi dalu am barcio achos mae maes parcio yn y swyddfa. Dydy hynna ddim yn broblem i fi."

Yn ôl Cyngor Dinas a Sir Caerdydd, hyn a hyn o barcio sydd ar gael a dyw'r polisi blaenorol gafodd ei gyflwyno yn 2016 ddim yn addas ar gyfer dinas ranbarth sy'n tyfu'n gyflym.

"Trwy wrando ar drigolion a busnesau ry' ni'n sicrhau bod ein strydoedd yn gweithio i bawb," meddai'r Cynghorydd Dan De'ath sy'n gyfrifol am gynllunio a thrafnidiaeth.

"Ry' ni'n cefnogi cymunedau lleol, yn taclo traffig ac mae hyn yn ein helpu i gyrraedd targedau hinsawdd."

Os bydd y cynllun yn cael sêl bendith fe fydd yn rhaid diweddaru rheolau traffig presennol yr awdurdod lleol. Bydd angen ymgynghoriad arall er mwyn gwneud hynny.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.