Cwest: Dyn, 22, wedi marw ar ôl cael ei drywanu ger Pontypridd

Roedd Liam Woolford, 22, yn dod o Borth, Rhondda Cynon Taf

Bu farw dyn yn Rhydyfelin ger Pontypridd ym mis Medi wedi iddo gael ei drywanu yn ystod ffrwgwd ar y stryd, mae cwest wedi clywed.

Cafodd Liam Woolford, 22, ei gludo i Ysbyty Athrofaol Cymru yng Nghaerdydd wedi iddo gael anaf dwfn yn ystod y digwyddiad.

Clywodd y cwest fore Mercher yn Llys y Crwner ym Mhontypridd fod Mr Woolford wedi marw yn ystod llawdriniaeth a bod Heddlu'r De wedi ymateb i'r digwyddiad wedi iddyn nhw gael nifer o alwadau gan y cyhoedd.

Mae archwiliad post mortem wedi'i gynnal a nodwyd dros dro bod Mr Woolford wedi marw o "anaf i'r bongorff (trunk) o ganlyniad i drywanu".

Yn ystod y gwrandawiad clywodd y llys fod Mr Woolford yn byw ym Mhorth ac wedi'i eni yn Llantrisant.

Fe wnaeth y crwner Kerrie Burge ohirio'r cwest tan ddyddiad diweddarach a chydymdeimlodd â theulu Mr Woolford.

Mae pedwar dyn wedi cael eu cyhuddo mewn cysylltiad â'i farwolaeth ac mae disgwyl iddyn nhw ymddangos yn y llys eto yn ddiweddarach y mis hwn.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.