Cofio mynd i bysgota gyda Jimmy Carter yn 1986

Mae geirfa ar ddiwedd yr erthygl i bobl sy'n dysgu Cymraeg.

Jimmy Carter a Moc Morgan yn pysgota ar Lyn Clywedog

Mae cyn-Arlywydd Unol Daleithiau America, Jimmy Carter, yn 100 oed ar 1 Hydref 2024.

Ym Mehefin 1986, daeth ar wyliau i Dregaron, a mynd i bysgota gyda’r arbenigwr pysgota byd-enwog, Moc Morgan a’i fab Hywel.

Hywel sydd yn hel atgofion am y profiad "gwahanol":

O America i Dregaron

“Roedd person oedd yn berchen ar fferm yn Nhregaron yn advisor pan oedd Jimmy Carter yn arlywydd. Dyna’r cysylltiad gyda Thregaron,” eglurodd Hywel.

“Roedd e wedi dod i aros gyda’i ffrind. Roedd yr afon Teifi yn mynd drwy’r fferm, felly bysgotodd e ar afon Teifi."

Moc Morgan oedd ‘Mistar Pysgota' Cymru ar y pryd, felly cafodd wahoddiad i fynd i bysgota gyda’r cyn-Arlywydd a’i wraig, Rosalynn. Roedd Moc wedi dod â’i fab 18 oed, Hywel, i ymuno yn yr hwyl.

“Bysgotodd e ar Lyn Clywedog un bore; Dad a Jimmy ar un cwch, a fi a Rosalynn yn y cwch arall," meddai Hywel.

“Daliodd Rosalynn y pysgodyn cyntaf, ac yn ôl y sôn, roedd Jimmy i lawr am 5am y bore wedyn yn trio cael pysgodyn hefyd!

“Roedden ni wedi pysgota ar y Tywi hefyd. Ar yr ail noswaith, roedd gan Dad gyfarfod, felly aeth fi, Jimmy a Rosalynn gyda’n gilydd.”

Profiad gwahanol

Roedd yn brofiad “hollol wahanol”, meddai Hywel, yn enwedig i “fachgen o gefn gwlad”.

“Yn Clywedog, roedden ni mewn convoy, car heddlu o’n blaenau ni a bws mini, ond roedd Jimmy wedi penderfynu neidio mewn i’n car ni. Roedd y dyn security mawr yn dweud 'na'... ond pan mae Jimmy Carter yn dweud, ar bwy ti’n gwrando?!

"Mynd i lawr y lôn, ac edrych yn ôl, a’i wraig a’i ferch yn cael eu taflu i mewn i’r bws mini; pawb yn panicio oherwydd bod Jimmy eisiau mynd i bysgota!

“Anaml mae person yn mynd i bysgota gyda chwe security guard, dyn MI6 yn cario gwn, a marksman ar y mynydd. Roedd e’n agoriad llygad."

'Call me Jimmy'

Mae Hywel yn cofio'n ôl yn hapus am y dyddiau roedd wedi eu treulio gyda chyn-Arlywydd America, neu 'Jimmy'.

“Doedd dim airs and graces na dim. Roedd e ond ond eisiau siarad am bysgota. A ddywedodd e “call me Jimmy”. Pobl hyfryd.

“Roedd e wedi ysgrifennu llyfr am bysgota dros Ewrop, ac mae yna ddwy dudalen yn sôn am bysgota gyda ni. Roedd e wedi llofnodi llyfr yr un i Dad a fi.”

“Dyddiau yma byddai'r stori dros y cyfryngau cymdeithasol, ond doedd neb llawer o’r papurau yn gwybod.

"Ond roedd pawb yn yr ardal yn gwybod; aeth tua 20 ohonon ni i’r Talbot am fwyd un noson. Roedd hi’n amser cyffrous iawn.”

Mae'r llun yma o Jimmy Carter yn cael pryd o fwyd yno dal i'w weld ar wal tafarn Y Talbot yn Nhregaron, bron i 40 mlynedd wedyn - a dal yn destun sgwrs!

Geirfa

cyn-Arlywydd / former president

pysgota / to fish

arbenigwr / expert

byd-enwog / world-famous

hel atgofion / to reminisce

profiad / experience

berchen ar / to own

cysylltiad / connection

egluro / to explain

ar y pryd / at the time

gwahoddiad / invitation

ymuno / join

dal / to catch

yn ôl y sôn / so the story goes

noswaith / evening

cyfarfod / a meeting

yn enwedig / especially

cefn gwlad / countryside

o'n blaenau ni / in front of us

penderfynu / to decide

neidio / to jump

lôn / lane/road

taflu / to throw

anaml / seldom

gwn / gun

agoriad llygad / eye opener

treulio / to spend

llofnodi / to sign

yr un / each

cyfryngau cymdeithasol / social media

cyffrous / exciting