Lluniau: Cynlluniau £140m i orsaf drenau brysuraf Cymru

Trafnidiaeth Cymru sy'n arwain y cynllun i ailwampio gorsaf drenau brysuraf Cymru

Mae delweddau wedi eu cyhoeddi o edrychiad posib prif orsaf drenau Caerdydd fel rhan o gynllun gwerth hyd at £140m.

Bwriad Trafnidiaeth Cymru, sy'n arwain y cynllun, yw moderneiddio Caerdydd Canolog a helpu gyda chynnydd mewn nifer teithwyr yn yr hirdymor.

Mae'r cynlluniau'n cynnwys creu cyntedd mwy o faint er mwyn creu mwy o le i deithwyr, gwella llif teithwyr a mynediad drwy gatiau ychwanegol.

Bydd yna hefyd gyfleusterau aros, siopau a lle i barcio beiciau.

Mae'n fwriad hefyd i ddathlu hanes a threftadaeth yr adeilad.

Mae gwireddu'r cynllun yn dibynnu ar gymeradwyo'r cynlluniau a'r achos busnes llawn.

Bydd yr Adran Drafnidiaeth, Prifddinas-Ranbarth Caerdydd a Llywodraeth Cymru yn darparu hyd at £140m ar gyfer y gwelliannau.

Dywedodd Alexia Course, Prif Swyddog Masnachol TrC, y byddai'r gwelliannau yn gwneud yr orsaf yn "addas i wasanaethu prifddinas ag i ymdopi â thwf mewn nifer teithwyr yn y dyfodol".

"Mae'r cynigion ar gyfer yr orsaf yn cyfrannu at fuddsoddiad sylweddol ehangach o drawsnewid trafnidiaeth yn ninas Caerdydd ac mae'n cynnwys cynlluniau adfywio uchelgeisiol," ychwanegodd.

Mae disgwyl cyhoeddiad yn yr hydref ynglŷn â chymeradwyo'r cynlluniau neu beidio.

Os ydyn nhw yn cael sêl bendith mae disgwyl i'r gwaith ddechrau cyn diwedd y flwyddyn.