Cam ymlaen i rygbi merched yng ngogledd Cymru

Fe chwaraeon nhw eu gêm gyntaf yng Nghyngres Genedlaethol Ysgolion a Cholegau Cymru ar Barc Eirias ym Mae Colwyn brynhawn Mercher

Mae rygbi merched yng ngogledd Cymru yn cymryd cam pwysig y tymor hwn wrth i dîm academi newydd chwarae yn y gyngres genedlaethol.

Mae coleg addysg bellach Grŵp Llandrillo Menai wedi sefydlu academi i helpu datblygiad chwaraewyr rhwng 16 a 18 oed.

Fe chwaraeon nhw eu gêm gyntaf yng Nghyngres Genedlaethol Ysgolion a Cholegau Cymru ar Barc Eirias ym Mae Colwyn brynhawn Mercher.

Fe enillodd y tîm cartref o 67-21 yn erbyn Coleg Caerdydd a’r Fro.

Roedd Leah, y capten, o'r farn fod yr hyfforddiant ychwanegol am "wneud ni'n well pobl i rygbi"

Wrth siarad cyn y gêm ddydd Mercher roedd y capten, Leah, yn hyderus eu bod nhw eisoes yn chwaraewyr gwell ers iddyn nhw ddechrau ymarfer fel academi cyn yr haf.

Dywedodd: “Fyddwn ni’n cael lot mwy o training a’r gym, ‘den ni’n mynd lot i’r gym yn coleg. So ‘neith hwnna ddatblygu cryfder ni, pŵer ni a jyst gwneud ni’n well pobl i rygbi.

“A fyddwn ni’n cael mwy o amser gêm ac efo’r coaches hefyd, fyddwn ni’n cael mwy o amser efo nhw.”

Cynghrair newydd Cyngres Genedlaethol Ysgolion a Cholegau Cymru ydy’r lefel uchaf i ferched y tu allan i rygbi rhanbarthol ar gyfer y grŵp oedran 16-18.

Bydd yr academi’n darparu cyswllt rhwng y coleg a’r Ganolfan Datblygu Chwaraewyr ym Mharc Eirias, gan greu llwybr i symud ymlaen i chwarae i Rygbi Gogledd Cymru (RGC) ac o bosibl i dîm dan 18 Cymru.

Bydd chwaraewyr yn derbyn hyfforddiant technegol, tactegol a hyfforddiant fesul safle, yn ogystal â sesiynau cryfder a chyflyru yng nghampfa academi Coleg Llandrillo yn Llandrillo-yn-rhos.

'Llawer o dalent yn y grŵp'

Un o chwaraewyr Rygbi Gogledd Cymru, Ethan Fackrell, ydy un o’r rhai sy’n hyfforddi gyda’r academi ac mae’n dweud bod chwaraewyr addawol iawn yno.

“Mae ‘na llawer o dalent yn y grŵp yma. Ni ‘di gweld nhw’n chwarae i RGC 18s blwyddyn ddiwethaf a Cymru 18s.

“Ni’n edrych ymlaen at weld be’ maen nhw’n gallu gwneud yn chwarae gêm gyntaf i’r coleg, ond mae ‘na dalent mawr yma heddiw.”

Dywedodd Ethan Fackrell fod 'na "lawer o dalent yn y grŵp"

Un oedd yn edrych ymlaen i gamu i’r cae oedd y blaenasgellwr, Mabli.

Dywedodd ei bod yn "eitha’ nerfus ond ‘dan ni’n genod cryf ac er bod ni gyd ddim yn ‘nabod ein gilydd, ro’n i’n gweld yn y stafelloedd newid bod ni gyd yn eithaf parod ar gyfer y gêm.”

Aeth ymlaen i ddweud fod y criw wedi bod yn aros am y cyfle yma a'i fod yn "rili cyffrous.”

Dywedodd Mabli fod y criw wedi aros am y cyfle yma ers amser

Mae’r academi yn dal i chwilio am ragor o chwaraewyr, ac yn agored i chwaraewyr 16-18 oed o ysgolion uwchradd yn y gogledd.

Byddan nhw’n chwarae yn erbyn colegau eraill Cymru yn ystod y tymor.