Dyn, 21, wedi marw tra ar wyliau yn Benidorm

Cafodd Harvey Dominy ei ganfod yn ei ystafell wely ar Orffennaf 16

Fe glywodd cwest fod person 21 oed wedi ei ganfod yn farw mewn ystafell tra yr oedd ar wyliau yn Benidorm, Sbaen.

Cafodd Harvey Dominy, o Ferthyr Tudful, ei ganfod ar lawr ystafell y gwesty yn y man gwyliau poblogaidd ar noson 16 Gorffennaf.

Yn ystod y gwrandawiad ym Mhontypridd, clywyd bod y gwasanaethau brys wedi eu galw, ond roedd Mr Dominy wedi marw.

Cafodd y cwest ei ohirio, ac mae ymchwiliad i achos ei farwolaeth yn parhau.

Credir i Mr Dominy farw rhwng 21:00 a 22:30.

'Y bachgen gorau, yn frawd'

Cafodd archwiliad post mortem ei gynnal ond ni ddaeth i gasgliad dros dro ar achos y farwolaeth.

Fe wnaeth y crwner cynorthwyol, Kerrie Burge, ohirio'r cwest, gan ddisgwyl am fwy o wybodaeth gan awdurdodau Sbaen.

Fel teyrnged i Mr Dominy, fe ddaeth ei ffrindiau at ei gilydd i ryddhau balŵn yn agos i'w dŷ.

Fe wnaeth ffrind agos i Mr Dominy, Liam Greenway, gyfeirio at y golled ar y cyfryngau cymdeithasol, gan ddweud: "Dwi wir ddim yn gwybod beth i'w ddweud, dwi wedi colli rhan ohonof, ti oedd fy mraich dde.

"Roeddet mor arbennig i bawb ond yn bennaf i mi, y bachgen gorau, yn frawd."

Fe ddaeth ei ffrindiau at ei gilydd i ryddhau balŵn yn agos i'w dŷ er cof amdano

Fe wnaeth clwb nos Kooler ym Merthyr Tudful hefyd roi teyrnged, gan annog pobl i godi gwydraid er cof amdano wrth chwarae "Forever Young" dros y penwythnos.

Fe rannodd y clwb nos neges oedd yn dweud: "Rydym yng nghlwb nos Kooler wedi ein tristáu’n fawr o glywed am farwolaeth Harvey Dominy.

"Roedd ei egni lliwgar a'i gefnogaeth ddi-ben-draw yn dod â chymaint o fwynhad i bawb oedd wedi cael y fraint o'i adnabod. Mae ein meddyliau a'n gweddïau gyda'i deulu a'i ffrindiau yn ystod y cyfnod anodd hwn."

Mae ymchwiliad i achos marwolaeth Mr Dominy yn parhau.