Dechrau'r cam olaf o adfer pier Bangor ar ôl 'wyth mlynedd hir'

Cafodd Pier y Garth ym Mangor ei agor yn 1896

Mae cymal olaf y gwaith o adfer pier adnabyddus yn y gogledd wedi dechrau ddydd Llun, ar ôl i apêl lwyddo i godi £46,000 tuag at y gwaith.

Wedi'i agor yn 1896, mae Pier y Garth ym Mangor yn safle rhestredig Gradd II, a dyma'r ail bier hiraf yng Nghymru - 1,500 troedfedd o hyd.

O'r pier mae'n bosib gweld dros Afon Menai, Ynys Môn, Llandudno a mynyddoedd Eryri ac mae wedi ennill gwobrau fel Pier y Flwyddyn yn 2022.

Mae gwaith i ddiogelu'r pier am y degawdau nesaf wedi dechrau ers 2017, ond er mwyn ariannu cymal olaf y gwaith fe lansiwyd ymgyrch codi arian fis Awst.

Dywedodd Avril Wayte, cadeirydd Cyfeillion Pier Garth Bangor, fod y gefnogaeth i'r apêl wedi bod yn "hollol anhygoel", a'u bod wedi codi mwy o arian na'r targed o £40,000.

Mae'r gwaith ar y cymal olaf yn dechrau ddydd Llun, "wyth mlynedd hir yn ddiweddarach", medd Avril Wayte

Dywedodd Ms Wayte fod y Pier y Garth yn "brydferth ac yn wirioneddol anhygoel, beth bynnag fo'r tywydd".

Esboniodd fod y pier wedi cael ei ailagor yn yr 1980au, "ar ôl bod ar gau am flynyddoedd lawer".

"Ni chafodd gwaith ei wneud ar ôl hynny, tan 2017 – pan gychwynnodd gwaith trwsio mawr arno," meddai.

Yn siarad fore Llun, dywedodd mai "heddiw ydy dechrau cam olaf y gwaith a ddechreuodd yn 2017 – wyth mlynedd hir yn ddiweddarach".

Ni fydd y gwaith yn tarfu ar ymwelwyr, yn ôl Ms Wayte, gan fod y gwaith sydd i'w gwblhau o dan y pier - ar y gwaith metel.

Wedi wynebu bygythiadau o gael ei ddymchwel dros y blynyddoedd, Cyngor Dinas Bangor sydd bellach yn berchen ar y pier ac yn ei gynnal, wedi iddyn nhw ei brynu am 1c yn 1975.

Mae cyngor y ddinas hefyd yn buddsoddi £40,000 i dalu am ran olaf y gwaith.

Cwblhawyd rhaglen adfer gwerth £1m ar rannau o'r strwythur yn 2022, gyda chefnogwyr y pier yn nodi y byddai'r gwaith diweddaraf yma yn ffurfio cam olaf y prosiect.

Mae'r Cynghorydd Medwyn Hughes wedi dweud yn y gorffennol fod y gwaith gyda'r pwrpas o wneud y pier "yn ddiogel ar gyfer y 25 mlynedd nesaf".

"Y pier ydi'r prif atyniad ym Mangor gyn belled a dwi'n y cwestiwn, fe gawsom ni dros 100,000 o ymwelwyr y llynedd sy'n nifer sylweddol," meddai Mr Hughes pan gafodd yr apêl ei lansio.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.