Cwmni eisiau creu pedair gorsaf micro-niwclear ym Mhen-y-bont

Dyluniad artist o sut y byddai'r unedau yn Sir Pen-y-bont ar Ogwr yn edrych

Mae cwmni Last Energy UK wedi cyhoeddi cynlluniau i adeiladu pedair gorsaf micro-niwclear ar hen safleoedd glofaol ym Mhen-y-bont.

Fe allai Prosiect Egni Glan Llynfi, sydd â buddsoddiad economaidd gwerth £300m, greu hyd at 100 o swyddi newydd yn ôl y cwmni.

Byddai'r pedair uned yn Sir Pen-y-bont ar Ogwr yn gwasanaethu cwsmeriaid diwydiannol lleol.

Yn ôl y cwmni, byddai allbwn y safle cyfwerth â phweru oddeutu 244,000 o gartrefi.

Mae'r cwmni yn gobeithio agor yr orsaf gyntaf erbyn 2027.

'Ar flaen y gad ym maes technoleg niwclear'

Dywedodd Michael Jenner, prif swyddog gweithredol Last Energy UK y bydd y prosiect yn creu cyfleoedd economaidd i gwmnïau ledled de Cymru.

Yn ôl Gweinidog Diogelwch Ynni a Net Sero Llywodraeth y DU, yr Arglwydd Hunt: "Gall prosiectau niwclear newydd adfywio cymunedau trwy ail-bwrpasu hen safleoedd diwydiannol a chwistrellu swyddi a buddsoddiad newydd.

“Mae hyn ar flaen y gad ym maes technoleg niwclear a gallai helpu ddatgarboneiddio diwydiant trwy ddarparu gwres a phŵer carbon isel."

Ychwanegodd Tom Greatrex, prif weithredwr Cymdeithas y Diwydiant Niwclear bod angen prosiectau fel hyn i wneud datgarboneiddio yn "realiti yn hytrach na slogan".