Tân Bwlch-llan: Enwi menyw fu farw a rhyddhau dyn heb gamau pellach

Roedd difrod sylweddol i'r eiddo yn ardal Bwlch-llan ger Llanbedr Pont Steffan

Mae menyw a fu farw mewn tân yng Ngheredigion ddydd Llun wedi cael ei henwi'n lleol fel Heather Edwards.

Fe gafodd criwiau Gwasanaeth Tân ac Achub Canolbarth a Gorllewin Cymru eu galw i'r lleoliad ger Bwlch-llan tua 14:15.

Fe gafodd dyn 58 oed ei arestio ar amheuaeth o lofruddiaeth yn dilyn y digwyddiad, ond cadarnhaodd yr heddlu brynhawn Mercher ei fod wedi ei ryddhau ac na fydd yn wynebu camau pellach.

Fe ddywedodd yr heddlu hefyd nad ydynt yn chwilio am unrhyw un arall mewn cysylltiad â'r digwyddiad, a'u bod yn trin y farwolaeth fel un "anesboniadwy" ar hyn o bryd.

Ychwanegodd y datganiad: "Nid yw'r corff wedi ei adnabod yn ffurfiol, ac mae disgwyl y gallai hyn gymryd amser.

"Bydd presenoldeb yr heddlu yn parhau yn yr ardal, a swyddogion yn parhau â'u hymholiadau."

Dywedodd Ceris Jones ei bod yn "cydymdeimlo'n fawr gyda theulu a ffrindiau yr unigolyn"

Fe ddywedodd Ceris Jones sy'n cynrychioli ward Llanfihangel Ystrad yng Nghyngor Ceredigion bod e'n "newyddion trist ofnadwy".

"Mae e wedi siglo'r gymuned gyfan. Mae lot o bobl yn 'nabod nhw'n y gymuned a mae wedi dod fel sioc enfawr yn fwy na dim.

"Ni'n cydymdeimlo'n fawr gyda theulu a ffrindiau yr unigolyn.

"Mae Bwlch-llan yn bentref bach, maen nhw'n gymuned glòs, a fi'n siwr bydd yr heddlu yna am sawl diwrnod arall yn gwneud ymholiadau ac yn gwneud eu gwaith yn ymchwilio i'r mater.

"Dwi eisiau i'r gymuned ffindio hynny fel reassurance achos maen nhw'n gwneud eu gorau i ddod at wreiddyn y digwyddiad.

"Fi'n credu bod e'n bwysig hefyd bod ni'n gadael i'r heddlu i wneud eu gwaith, iddyn nhw ffindio mas beth sydd wedi digwydd."

Y Parchedig Stephen Morgan a arferai fod yn weinidog yn yr ardal

Roedd y Parchedig Stephen Morgan, sy'n byw yn Nhrefilan gerllaw, yn arfer bod yn weinidog ym Mwlch-llan.

"Mae'n rhyfeddol o beth. Mae e'n beth anarferol," meddai.

"'Dyn ni fel brodorion yn methu dygymod â sefyllfa debyg i'r hyn sydd wedi digwydd ac mae'n ddirgelwch, hyd yma, sut mae'r peth wedi digwydd.

"'Ni'n deall bod yna gorff wedi ei ddarganfod yn yr adeilad sydd wedi llosgi yn ulw ond mae'r cyfan yn ddirgelwch llwyr."

Mae blodau wedi cael eu gadael ger pen lôn y ffermdy

Dywedodd y gwasanaeth tân fod criwiau wedi brwydro yn erbyn tân oedd "wedi datblygu'n sylweddol" mewn adeilad deulawr sydd ynghlwm wrth ffermdy.

Ychwanegodd bod yr ymdrechion yn fwy heriol gan fod y gwynt yn gryf ar y pryd.

Yn ystod y digwyddiad, fe ddaeth "gwybodaeth newydd i'r amlwg" bod un unigolyn ar goll.

Fe ddaethon nhw o hyd i gorff yn yr adeilad ar ôl i'r tân ddod dan reolaeth, ychwanegodd y gwasanaeth tân mewn datganiad.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.